人工$13,000仲要住劏房 上到公屋已經係人生贏家｜網民熱話
廣告
【劏房・網民熱話】筆者係啱出世無耐，就面臨家道中落危機，住嘅地方每況愈下，到我升上小學5年班果陣就已去到住劏房嘅局面。一張雙層床，上層係我同家姐，下層就雙親；煮飯就用gas爐，廁所我就唔會用共用果個，而會選擇去最近運動場嘅更衣室，因為實在乾淨得太多太多！
撰文：Purple弟弟 | 圖片：新傳媒圖片庫、unsplash
好多人都會驚曱甴，我都係！但自從住過劏房之後，對曱甴就無乜感覺，最差係試過夜晚起身想去廁所，貪方便一下跳落地下唔用梯，結果我感覺到我赤裸嘅腳板有一陣涼氣…為咗改善居住環境，申請公屋當然一早做咗，只係一年又一年，音訊全無！
結束3年劏房生活
而我老豆係房署嘅看更，眼見其他人條件同自己差唔多，申請時間仲遲，但都已經排到樓，於是都忍唔住趁啲高層落去食lunch果陣捉住佢地問清楚！
雖然唔知關唔關事啦，但一個月後我地就收到通知，係天水圍嘅單位，如是者結束咗我3年嘅劏房生活！
住咗公屋之後，我唔洗再去更衣室沖涼，唔洗再去自修室同人搶位，我明白到住係幾咁重要！
但現實總是殘酷嘅，樓價天咁高，我大學畢業第一份工先$13,000多少少，你唔好同我講咩理想，我想先有地方住！
如果根據馬斯洛的需求層次理論去睇嘅話，實現理想應該就係最高嘅第五層－自我實現需求，咁要去到第5層一定要先行完頭果4層，我又睇睇自己行到去邊？
第一層－生理需要？我唔愁衣食住行，都叫做過關；第二層安全需求又如何？
無地方住要日曬雨淋喎，不過用呢個做例子實在太唔貼地，換一個例子，我買唔到樓逼住租，要比業主威脅甚至加租搞到你精神健康受壓，生活唔穩定，原來我只係去到第一層…
依家諗返先發現，無理想其實都好合理……
