為權力唔認兄弟 以前好同事 升職即「揸正嚟做」｜辦公室政治｜藍橘子
撰文：
｜ 圖片：網上圖片
同事升職即「揸正嚟做」
最近有個朋友正因為呢件事唔多開心，佢喺公司做咗六年，幾個男同事一齊出生入死，好多大Project都一齊搏返嚟。
所以幾個人互相稱兄道弟，連結婚擺酒都搵對方做兄弟。
終於，幾個月前佢哋幾個捱出頭，其中一個兄弟升職做經理，管晒幾條Team。
捱咗咁耐，雖然唔係自己升職，但都替兄弟高興，當晚放工幾個兄弟去慶祝飲酒，本來以為幾兄弟永遠唔會出現辦公室政治，點知…
唔夠一個月，升職嗰位兄弟自從做咗經理，任何事都「揸正嚟做」，例如唔可以去後樓梯煲煙打機，以前出去見差不多收工，會直接提早放工。
但而家見客都要限時，見完立即返公司。
延伸閱讀：沉迷傳說對決、PUBG的打工仔 因為工作沒法得到應有的成功感
體驗1分鐘貸款批核，隨時提款話咁易！
升職令兄弟情決裂
幾個兄弟試過坐埋一齊傾掂佢，但做經理嗰個話「呢個係老闆Order，老闆一直都唔鍾意，而家叫我執返正，我都無辦法。」
就因為呢一句，兄弟情就決裂了。
連平時個whatsapp group都好少出聲，幾個兄弟已經另開一個小圈子group，連食飯踢波都無預嗰位高層。
因為覺得佢一升職就揸雞毛當令箭，為咗權力唔認兄弟，成日掛住同高層食飯，成個人唔同晒。
作為一個旁觀者，覺得升職嗰位經理左右做人難，如果真係老闆落Order，真係幾難拒絕。
延伸閱讀：射波早收工 偷懶唔緊要 最重要對得住成班同事
每日上演《權力遊戲》同《深宮計》
如果一個經理唔管住下屬，咁點解要升你做經理？
加上上述嗰位經理同時管幾條Team，如果偏坦兄弟又會被其他人背後講壞話，唔通仲繼續一齊蛇王煲煙打機咩？
經理級高層互相都有競爭，每日都上演住《權力遊戲》同《深宮計》，唔打交道好難保住權力地位。
身份地位唔同咗，成個世界觀唔同晒，自然唔可以用返以前做比較。
有句說話，當你電話簿喺對方個名前面加咗公司名，就永遠做唔到朋友。原來係有道理…
