人工$70,000壓力爆煲辭職 學啲後生仔去Working Holiday

撰文：不覊 | 圖片：電視截圖、unsplash

人工包埋受氣？

以上係我一個老朋友的寫照。我哋成班朋友都好羨慕佢，事實上，佢有今時今日都係值得的。

呢個老友由細到大出名勤力，大學畢業就入咗一個大型機構做嘢，其間又不斷進修，為機構扑心扑命，佢攞到呢份人工同坐到呢個位，係絕對應得。

之但係，每件事情都總有代價，佢坐得呢個位，當然要食唔少屎，朋友話，佢對上嗰個係失婚婦人，脾氣有啲古怪，總之係女人情緒發作之日，就係朋友受氣之時。

近年機構要捽數，老友當然首當其衝，佢單身寡佬一支公，我見佢平日晚晚都OT到了11、12點，好多時連星期六日呀、紅色假期都要返工，話就話補返，但點可能補到呢？去到年尾，咪一次過報銷囉。

咪睇佢好似一人之下萬人之上，下面有成班手足跟佢搵食，咪以為好威風，查實都係有苦自己知。

尤其而家啲90後小朋友，成日怨人工低，又話做幾多年都買唔起樓，返工無人生目標同樂趣，一個唔鍾意就話唔撈，你真係企咗喺度。

講返個老友，佢話最大問題係工時太長冇得休息，同埋上頭捽數，以及永遠都做唔完的工作。

老友最近發現自己身體好差，唔知點解，一早返到寫字樓就會肚瀉同胃痛，日日如是，間唔中會身上出紅疹，哈，但好奇怪喎，每當放長假，嗰啲病徵就一下子消失。

但係一返工呢，啲病徵又會走晒出來喎。捱到今年年尾，朋友終於做咗一個重大決定，就係放棄佢份高薪厚職。

佢話打算學啲後生 Working Holiday。講笑咩，都成 40 幾歲人挨近5張，有邊個國家肯接受你呢啲老鬼去 Working Holiday先。老友話人哋唔接受咪自製囉。

呢個老友勝在儲蓄為王，咁多年來都唔大洗，加上一支公又冇拖拍，幾乎每個月一大截人工儲起。

到今天，你話佢提早退休又好，出國學啲後生 Working Holiday又好，至少搵返自己生活。

老友話，佢好想去韓國住一排，學吓韓文，已經預咗60萬港紙作為旅居兩年的洗費同學費，至於將來係點，到時先再作打算。

好多人叫佢三思，返來好難再搵返份咁好 PAY 的工。但朋友話，如果而家唔走，佢好驚自己冇命享。人生，好多時真係冇嘢可以預計得到。