紅磡裝修黑店！老公信錯朋友淪「爛尾核爆樓」事主遭伯爺恐嚇收貨（多圖）
紅磡裝修公司爛尾
有紅磡網民於社交平台分享，表示自己因缺乏經驗和信錯朋友，最終因裝修一事賠上金錢、時間和精神，由於事主答應丈夫不公開公司名，以免惹上麻煩，只有在帖文中透露發生在自己第上的裝修中伏經歷。
據事主發文內容，事主找來一間紅磡區裝修公司來翻新所住的單位，由於安樂窩殘舊，不少地方需要裝修，於是事主丈夫找來朋友的裝修公司幫忙。起初以為「朋友信得過，點知一肚火」，原因是承諾兩個月內完工拖遲了半年，還差點爛尾收場，而且手工「差都極點」。
事主憶述，朋友的裝修公司將單位「整到啲嘢又花又爛」，事主每次到場視察進度時，經常無人開工，而且屋內滿佈垃圾；即使事主多番催促投訴都愛理不理，最後要到裝修公司門市驚動到「伯爺」，才答應幫忙執手尾。
正當事主二人以為可以安心等待入伙，誰不知「伯爺」要求先付尾數再動工，理由是丈夫朋友「無俾錢佢，只係肯將尾數交佢收取」。事主無奈之下尋找各方意見，發現當初丈夫太信任朋友，所以未有將細節加入合約，因此情況對事主相當不利，「只好無奈就範」。
其後，裝修公司「伯爺」接手後竟然敷衍了事，「仲衰過我老公平時自己落手落腳維修嘅手作」！據事主所述，即使跟伯爺理論，二人反被「恐嚇」，「仲話自己一把年紀唔怕坐監，迫到佢無路可走殺人佢都敢」。
由於情況轉趨惡劣，事主跟老公商討後「怕咗佢哋」，由於已經在外租樓半年，再拖遲只會損失更多時間和金錢，「更何況呢個局面再僵持落去，對我哋都冇任何好處」，最後唯有妥協收樓再補救。
事主表示，幸運地遇到一位多年不見的朋友，答應用最短時間善後，而且還提供很多專業意見和分析，並加添了細緻改善方案，最終以「友情價」安裝了智能座廁。
事主認為，經過今次遇人不淑經歷，深深體會到選擇裝修公司要多比較、多打聽，工程細節一定要清楚寫入合約，特別是完工日期，又希望「大家都唔會好似我老公咁傻信錯朋友」。
網民點睇？
- 「阿爸教落：裝修，買樓，投資，紅白二事，切忌搵熟朋友。」
- 「其實都唔會再做朋友架喇，開佢名等多啲人識，減少受害者嘛！」
- 「唔開名，唔值得同情你，因為你都係縱容緊呢啲黑店，希望你早日醒覺開名。」
- 「其實根本唔關熟唔熟朋友事，明顯你老公無真正認識果位朋友嘅為人。」
- 「呢D垃圾公司，垃圾師傅！咁都收得到錢，真係掛個牌識裝修都搵到錢。」
- 「裝修真係短幾年命！所謂朋友介紹或親戚介紹大多中伏！」
- 「樓主啲相，加埋好似唔似同一個單位。」
- 「呢啲手工真係學徒扮師傅。」
- 「一係自己做，一係上討論區搵評語高啲裝修舖。」
- 「呢個業界精英喎，咁都唔開名，你老公唔係仲想同佢做朋友呀？」
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
