「虛App神棍」 5招氹你入局要小心！
有邊個唔想盡快達至財務自由？ 喺社交媒體成日有人吹噓自己係投資大師，識咗你之後向你推介投資App，佢話自己知道晒啲升跌規律，仲唔介意share 貼士俾你，總之就「零風險高回報」、「跟佢買賺硬」! 其實，呢個世界邊有零風險一定賺嘅投資㗎？有內幕消息點解要講你知呢？ 莫非同你有親？ 其實，所有嘢都係騙徒氹你落叠嘅糖衣陷阱，我地一齊拆解呢班「虛App神棍」嘅5招行騙伎倆。
第1招：騙術迴戰
使出掩眼騙術，喺網上平台扮晒投資專家，以低風險、高回報作招徠，吸引你參與投資。
第2招：疑幻似真
引你主動聯絡騙徒，再氹你安裝真假難分嘅投資App，之後假「客服」會叫你先入錢去個人銀行賬戶，就可以開戶及進行買賣。
第3招：勝利幻象
製造假象，初時會先俾少少甜頭你，等你套現少量回報，令你誤以為之後都會有豐厚利潤，繼而加碼投資。
第4招：已Lock不回
當你想連本帶利拎錢走，假「客服」會聲稱系統故障拖延付款，或者要繳交高昂保證金、稅金等等，總之就諸多藉口唔俾你拎錢走！
第5招：一鋪清零
最後，你成副身家被清零，甚至搞到家破人亡！
唔想財產一夜蒸發，即登入「防騙季」專頁：https://www.adcc.gov.hk/zh-hk/anti-deception-month.html
想接收更多防騙資訊，請瀏覽反詐騙協調中心網站 https://www.adcc.gov.hk
(Presented by 反詐騙協調中心)
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
