【品牌故事】Signal創辦人Brian Acton有份創辦WhatsApp 因不認同Facebook理念棄8.5億美元分紅自立門戶

職場

Jan 14 2021

創立Signal來打返自己創立的WhatsApp，可能好多人知，不過我唔知。原來近來爆紅嘅Signal Messenger的其中一個創辦人Mr. Brian Acton，亦係WhatsApp的其中一個創辦人之一。

授權轉載：The Rolodex｜圖片：AM730、Unsplash、Signal官方網頁

Brian Acton不認同Facebook理念毅然離開WhatsApp

WhatsApp於2014年被Facebook收購之後，Brian Acton因為不同意Facebook在客戶資料、廣告推廣方面不太尊重用戶私隱度的政策，而離開WhatsApp。如果Brian 選擇遲一年離開Facebook，佢將會多收8.5億美金（約港幣65.9億美元）的Facebook股票。

不過可能佢唔care，因為賣WhatsApp單deal佢賺咗30億美金（約港幣232億美元），點都好佢有骨氣，道不同不相為謀。

Signal創辦人竟是WhatsApp之父棄8.5億美元分紅自立門戶只為向廣告説「不」 — WhatsApp於2014年被Facebook收購，Brian Acton因為不同意Facebook在客戶資料、廣告推廣方面不太尊重用戶私隱度的政策，最終離開WhatsApp（圖片：AM730）

Brian Acton創立WhatsApp原意為用家提供無廣告滋擾的溝通渠道

喺一個訪問當中，Brian表達咗佢覺得對唔住Whatsapp的用戶，皆因佢自己好唔鍾意廣告。佢創立WhatsApp，就係想畀用戶喺一個無廣告滋擾的環境下溝通。但最後，佢竟然把WhatsApp賣畀Facebook（全世界最大間用廣告來賺錢的公司）。

據Brian所講，佢曾經嘗試游說Facebook高層，把WhatsApp改為一個收錢的App。舉例，如果send超過某個數目的訊息就會開始收錢。不過Facebook的高層聽到就已經唔係太鍾意，所以佢嬲嬲哋之下就辭職走人。

Brian Acton曾因廣告問題出走Yahoo!

其實10幾年之前，Brian喺Yahoo!打工的時候，亦都係因為唔同意Yahoo!喺所有版面都放廣告banner而辭職。所以大家如果有機會同佢做嘢，就千祈唔好提「廣告」兩個字，如果唔係佢會辭職。

Brian Acton以5,000萬美金創立Signal Foundation

之後喺2018年，Brian Acton投放了5,000萬美金，用自己錢，創辦了一個非牟利組織：Signal Foundation，即係SignalMessenger的創辦組織。佢希望重拾WhatsApp的初衷，以免費、無廣告、最尊重客戶私隱的方式，來提供一個Messenger畀大家。Signal Foundation長遠的營運經費將會以自願募捐形式來籌集。