9型麻煩人格 你身邊啲同事中幾多
撰文：Nic Chan | 圖片：unsplash
1. 過度投入型
叫到做事永遠不會托手踭，日日OT，任勞任怨。不過他的努力，分分鐘令老闆覺得其他同事不夠勤力囉。
如何應付：意志力稍為鬆懈，隨時一下被打敗。
2. 練精學懶型
追求工作生活平衡，最擅長扮工減輕工作量，識得利用過度投入型同事，幫手完成未做工作。
如何應付：同事一樣扮懶扮hea樣，無人幫到手，自然自己工作自己做。
3. 緊張大師型
每次預定工作有調動，便會出現神經緊張，不但無法幫助處理事情，更會將神經狀態傳染予同事，搞到大家一齊精神衰弱。
如何應付：要避免傳染，緊記「船到橋頭自然直」。
4. 乜都管型
有操控狂，認為自己有效管理所有事，隨時連同事放工做什麼都要管！
如何應付：反客為主，反過來找他麻煩。
5. 乜都扮知型
每次對話均是「我知啊！」不過未必「真．知道」，只是扮博學多才，工作到最後全部搞不好。
如何應付：最緊要避開，免得自己招惹麻煩。
6. 不問世事型
只會做好自己的事，除非得到好處，一般不會幫助他人。
如何應付：偶爾獻殷勤。
7. 是非精型
公司上下左右的大小事，包括同事各種私生活，都會去八卦，然後週圍唱。
如何應付：這類同事通常未能守秘密，小心有一日將你出賣，所以最好保持隔離。
8. 不合群型
工作以外，與同事「零交流」，任何時候均「自我隔離」。
如何應付：這類人盡量避開即可。
9. 扮小丑型
經常希望為辦公室帶來歡樂，不過次次都搞爛gag，令同事不知如何應對。如果遇上玩樂心態工作，應該得不到大家歡迎。
如何應付：只要對爛gag無反應，試多幾次，這類人自然會收聲。
延伸閱讀：切勿耳仔軟 俾說話老細聽 7個要求加人工的方法
要老細出錢真係好難架！嗰個伸手去銀包拎錢出嚟嘅三秒動作，對於一眾老細嚟講難過奧運舉重，當佢真係拎咗出嚟嘅時候，哪怕只係一點點，佢都覺得好似贏咗奧運獎牌咁值得歌頌佢自己！不過所謂關關難過關關過吖嘛，香港人最叻就係創造奇蹟，等小編教你7招點解創造要老細加人工呢個奇蹟中嘅奇蹟啦！
撰文：Smart ED編採部｜圖片：unsplash
1. 俾說話你老細聽
有時講開買乜乜嘅時候，可以輕輕帶句啲嘢好貴呀、生活艱難咁，俾啲hints你波士知道你想加人工。
不過呢，呢招只適用於啲唔縮骨嘅波士，而大部份波士其實都好縮骨，九成九即刻側側膊扮聽唔到就算。
2. 直接同波士講你想加人工
其實你都心知肚明你波士係個咩人，第一招響佢身上嘅成效有幾大。所以與其旁敲側擊，不如你直接出擊。
加人工嘅嘢，其實只要你夠薑就可以提出。不過需要注意嘅係，你夠薑都好你都要有啲自知之明，如果你一向返工又唔係準時、做嘢唔係100%有交帶、成績又唔係特別好，咁就閉門磨練一段日子先啦……
3. 整個portfolio俾自己
將平時自己做得好、波士讚你嘅嘢儲起佢整理好，到時到候就拎出嚟同老細傾，作為你要求嘅有力理據。
呢招唔單止嗌加人工啱洗，甚至要求升職、或者搵下份工都非常啱用，可以深深impress對方，留下好印象。
4. 用數據證明你underpaid
到底出邊公司出緊咩條件俾同你同一個職位嘅打工仔呢？
不妨做多啲功課，上吓各大求職網了解一吓行內嘅趨勢，摘錄低啲數據資料，整理一下再展示畀你波士睇，以數字證明你係underpaid，須要加人工，否則遠走高飛。
5. 唔好咁易耳仔軟
老細緊係想節省成本，如果唔係你都唔洗自己開口啦。
老細永遠有一萬個理由唔加人工俾你：市道差、生意差、上面唔開心、佢唔開心…… 總之點都係想耍走你，佢差嚟差去嘅時候你要強調自己加人工嘅理據。
怯，你就輸了。
6. 問老細加人工要求係咩
不過，有啲老細就好好耐性，同你耍足個幾鐘太極都唔肯加。
呢個時候你再糾纏落去都無用，不如開宗明義問佢到底要達到咩條件先會加畀你。
不過記得企硬問清問楚，唔好畀老細又蒙混過去，否則下次都只會又有其他原因耍走你。
而如果你老細同你提出一啲無理要求嘅話，你要諗清楚係咪時候轉工喇。
7. 加唔到人工都要老細應承你一啲要求
放假又好、加津貼都好，總之加唔到人工都要拎返啲嘢走！
如果你可以無條件投降嘅話，俾老細覺得你易恰，繼續要你無條件應承佢一啲苛刻嘅要求。
為自己爭取返啲bargaining power，唔好輕易屈服，你要記住你係嚟make a deal，唔係嚟plead佢嘅！
