診所職場事 【寶豬趣聞】唔敢食嘅藥｜食藥｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

打電話嚟請教食藥問題

唔好講到請教咁嚴重，我受唔起㗎～
我：「如果你有啲咩健康上嘅問題，可以嚟問醫生呀」
佢：「唔係唔係，唔係健康嘢㗎，係啲藥嘅少少嘢啫，你應該知㗎」
你知唔知聽電話嘅我並唔係一個藥劑師，我只係負責登記。
我：「藥都問返醫生啦，我答你唔到㗎」

佢：「乜嘢呀，少少嘢咋喎，我喺日本買咗啲藥想睇吓食唔食得咋喎」
我：「我哋唔會對其他藥作出任何評論意見㗎，你有需要嘅嚟睇醫生啦」
佢：「唔係啲咩毒藥喎，駛唔駛咁快落閘呀？你驚我要你揹飛呀？」

只回應醫生處方嘅藥

正常人正常服用就應該唔係毒藥，誤服就有機會變成毒藥啦～
我：「唔係我哋醫生處方嘅藥，我哋一律係唔會回應㗎」
佢：「你呢啲咩官腔呀？我啲嘢有寫明係咩藥嚟㗎嘛」
咁你咪自己睇囉。你又要買，又要驚，做咩啫。
我：「先生，啲藥係你自己買嘅，我哋唔會清楚你買咗啲咩藥」
佢：「我梗係知你唔知啦，所以我咪打嚟同你講囉，藍色盒銀色字嘅」

最好係睇返家庭醫生

哇，你講得好清楚呀，你咁講完我即刻知係咩藥啦，仲好想請你食返一打半打呀。
我：「你有需要嘅話嚟睇醫生啦」
佢：「喂！啲藥我喺日本買返嚟㗎，你唔搵個人答我係咩藥我食唔食得，我點食呀？咁我買返嚟做咩先」
買嚟自尋煩惱？～

我：「每個人嘅身體狀況都唔同，每個病嘅病況都唔同，唔係人哋食呢隻成藥OK就等如你都OK，有唔舒服就最好睇返自己嘅家庭醫生。」
佢：「垃圾啦！」
嘟，我被CUT線了。
買完返嚟又係掉又係變垃圾，堆填區真係多謝你呀！