診所職場事 【寶豬趣聞】醫生冇料到｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

小姐嚟診所睇醫生

佢：「你個醫生係咪冇咩料到㗎？」
我：「點解咁講呀？」
佢：「佢好似咩都唔識咁嘅？」
咦，睇嚟小姐你都立志係要做個有料嘅醫生，好有料咁喎？
我：「醫生咩都唔識？」我笑笑。
佢：「係呀，我同佢講啲咩佢都好似覺得唔係咁，好似覺得我呢啲係小兒科嘢」

生痱滋定係口腔癌

我望望排版：「你生痱滋啫～你記住搽藥膏呀，如果到時仲係唔好嘅記得返嚟再睇」
佢：「我就覺得冇咁簡單囉，我上網Google過話有可能係口腔癌嚟㗎！」
失覺失覺，原來你係坊間n咁多個嘅鼎鼎大名嘅google醫生…其中一個！

鼎鼎大名嘅google醫生

我：「總之你今次睇完搽完藥膏都係冇好轉嘅話，你就再過嚟診所俾醫生睇睇啦～」佢：「如果係痱滋嘅話，我唔駛嚟睇都得啦，我去藥房買枝痱滋膏有幾難呀，我就係google過覺得自己唔係咁簡單先過嚟呀嘛」
咁你又唔去藥房嘅？

我：「你啲痱滋好耐㗎啦？」我又望望排版，兩日咋喎…
佢：「上網話有機會係㗎嘛！所以我先覺得你醫生冇咩料到咋嘛」
你點解唔叫google開埋藥俾你食？幫你搽埋藥膏呀？

快啲去考牌做醫生

我：「你試吓搽咗藥膏先啦，真係冇好到嘅你再過嚟啦～呢度三百蚊呀」
佢望住枝藥膏：「吓？咁就三百㗎啦？哇，醫生都幾好賺㗎喎，冇料到都值三百㗎？你個醫生都唔係好幫到手啫…」
係呀，你好快啲去考牌做醫生啦。