職場老屎忽專恰Fresh grad？資深連登仔自創6大守則教「00後」活下去！

一名網民在連登討論區發文，總結職場上打滾10多年的感悟，並分享6大守則，幫助新入職的「00後」在職場上少走彎路：

1. 唔好當同事係friend

「同事只係同你一齊工作嘅隊友，工作唔係交友，正如打LOL你都會鬧爆隊友，同事有事嗰陣一樣照推你出去頂，人前扮關心你，人後插你兩刀。」

「當你視同事係朋友一吐苦水時，佢轉身向上層報串搞到你一身蟻。」

2. 唔好對公司有感情

「你只係公司搵錢工具。見唔少人返工對公司有感情，出錢出力幫公司，轉個頭公司唔好景就炒咗。」

「你對公司講感情，公司連你邊個都唔記得。」

3. Part Time 要惡過狗

「雖然Part Time唔重要，只係公司其中一個齒輪，但如果呢個齒輪突然要轉公司就好麻煩。」

「Part Time係大晒，有咩事唔鍾意直接講話唔想做，高層仲驚過你。」

4. 對同事打好關係好過用心工作

「啱啱先講完唔好當同事係 friend，其實冇矛盾。多啲搵同事吹水，打好關係，但記得唔好投放感情落同事度。」

「只要打好晒關係，做錯事都唔會畀人屌。但如果冇打好關係，就算你做得幾出色幾優秀都冇所謂。」

5. 人工永遠大於一切

「見到第二份offer人工高就直接去，就算老細話會升你職加你人工都係假，最後佢只係會諗方法搵人代替你。人工一切。」

6. 有咩事都唔使驚

「大不了咪唔做，做錯嘢要面皮厚。就算整爛嘢最多咪賠法定嗰$300。只要你乜都唔驚，啲同事自然懶得話你同唔會得罪你。」

貼文一出隨即引起一眾打工仔共鳴，紛紛留言一吐苦水：

• 「以前有份pt，阿姊當我狗咁，一話唔做就即刻低聲下氣乞返我。」
• 「見到啲00後打份pt，做到個檔好似自己有份咁。」
• 「當年自己出黎返第一份工都好小心，驚得罪人，而家啲啱啱出黎做嘢嘅就好大支嘢，係心態問題，多過經驗問題啦。」
• 「識做人好過識做野，係呢個世界既真理。」
• 「只要你唔驚比人炒就真係你贏，尤其做大公司 因為佢地批budget請人都要時間。」
• 「好多老sea food見你唔出聲忍咗佢，就會不停試你底線，反而你企硬，仲會更加欣賞你。」

不過，也有網民持不同意見，表示自己工作多年，「職場有唔少真心朋友幫助我好多，當然要睇際遇，如果你係職場上識到真朋友，會比所有野都更重要」又指，「重點係你自己要慢慢學識去判斷。」

延伸閱讀：網民指控「廢老私樓」霉髧墮 半世紀屋苑也中槍：買新樓益地產商仲好！

延伸閱讀：港人移民潮趨「大眾化」 美聯移民：可縮短永居至最少3年吸人才對抗