每個辦公室都有的「硬文化」留到最後 笑到最後 | 藍橘子 | 經一專欄

撰文：藍橘子 ｜ 圖片：電視截圖、iStock

每個辦公室都有的「硬文化」

我喺十多年職場生涯中，以「魚唔過塘唔會肥」為原則，跳糟過好多間唔同嘅公司，但我發現，每間公司入面嘅生態其實都係差唔多。

『有得早走好走啦，遲啲無機會』

剛入職一定聽過呢句說話，當你面懵懵坐喺電腦面前，眼見仲有五分鐘就收工，同事忙得焦頭爛額。然後同事走埋嚟同你講：「你可以走喇，珍惜呢段日子。」起初聽到，你會覺得自己好無用，完全融入唔到團隊。但當你做耐咗，你就真正體會到呢句說話嘅真正意義。

其實長時間工作唔代表你有能力，反而經驗同處事能力，冷靜應對突發事件先真正表示你有實力。不過好可惜…職場硬道理就係「留到最後，笑到最後」，晚晚通宵先覺得你係叻仔。

『就係咁麻煩㗎啦，我都無辦法』

發現愈大間公司，工作步驟就愈蠢。例如每份文件要重覆存喺唔同地方，要列印幾次，放喺唔同嘅檔案。話就話想以防萬一怕出錯或遺漏，但其實工序愈多，犯錯率就會相對提高。曾經有間公司，每份文件除咗需要文件輸入，仲要員工用手抄多次以防萬一…

老闆話「用手逐個字抄就一定唔會漏！」「用電腦輸入，存檔就唔驚唔見！」結果員工每日抄寫文件，好似以前返學罰抄咁，事倍功半。

辦公室「硬文化」

好多新人都會提出對於咁蠢嘅工作方式提出質疑，但前輩一定會答：「係咁㗎喇～無辦法㗎喇～」高層唔明白下屬做嘅嘢亦唔聽下屬說話，令下屬更加唔敢提出意見。有能力嘅唔去改變現狀，新人又無能力反抗，最後變成惡性循環，亦係每間辦公室改變唔到嘅「硬文化」。