【轉工最佳時間】魚唔過塘唔肥！但次數多唔等於工作能力高
撰文：經一編輯部｜圖片：Unsplash
樓主：成日轉工係好事定壞事
日前，有人於香港討論區以「 理性討論：究竟成日轉工係好事定壞事」發文，樓主表示坊間對轉工有兩極的觀點，想知道網民對此的意見。
「聽過兩種意見，大家點睇？
- 成日轉工證明你份人Jumpy，唔穩定，公司唔合你少少心意就劈炮唔做，對公司同事唔忠心，靠唔住
- 成日轉工證明你有價值，因為無論你點轉都有人請，證明你有可取之處，有其他人冇既實力，仲可以不斷跳價」
網民：成日轉工「畀人感覺唔穩定」
帖子一出，引來網民熱烈的討論。有人認同第一種觀點，指經常轉工容易「畀人感覺唔穩定」，部分公司會「請都唔想請」。
- 「壞事，因為人哋間公司見到你成日轉都唔想請你。肯請你嘅，可以因為真係請唔到人做，係一份好惡哽嘅工。而且有很多嘢，要長時間先學到嘢」
- 「都要睇下咩職位，如果係基層職位，例如文員，技術員，當然唔係好事，見工時好多公司唔想請」
- 「唔係好事，一來累積唔到經驗，二來建立唔到人脈關係，三來無年資，四來僱主見你成日轉工點肯信任你？」
- 「轉得太密不太好，畀人感覺不太穩定」
「壞事。因為覺得你jumpy，有啲老細見到你成日轉工就唔願請。請你嗰啲只係唔介意你成日轉工，而唔係因為你成日轉工而請，唔好搞錯。你嘅價值在於你喺舊公司可以有幾大成就，有冇升職？當然適量嘅轉工都可以接受，但唔可以太密，而且要係同行，咁你嘅經驗先有價值。」
- 「由入職到熟練到有成績係要時間的。不停轉公司，重複摸索嘅階段，永遠停留喺低Level，不利發展」
- 「剛入職場或者ok，但長期每份工都是做一年半載，做嘅嘢都唔深入，咁轉工永遠係junior位，到3x歲甚至4x歲，公司點解仲用咁高人工請你呢？」
- 「公司人事部高層都話過見到CV成日轉工，即無份工做超過2年嗰啲，見都唔會見」
- 「其實HR會睇埋你每次轉工做份新工做幾耐同埋係咪有職級上嘅升級，如果你每份都無一年，咁HR會覺得你係做唔掂就走。另外，你如果跳嚟跳去都係做「𡃁」，咁跳得密都有問題，畀人印象都係差。」
不轉工等於能力差？
雖然不少網民認為經常轉工令人感覺「唔穩定」，但有網民卻指在一間公司做得太長且沒有升遷，反而代表工作能力有問題。相反，若打工仔轉工後能升職兼加人工，反而是對工作能力的肯定。在這個前提下，有網民認為經常轉工並非壞事。
「我in過有間該行業全球最大嘅公司，HR話我畢業後15年，淨係做過兩間公司，1間5年半，1間9年（MNC）， 所以怕我適應力唔夠，適應唔到佢公司文化喎。 然後佢又話佢自已5、6年做5、6間公司，好jumpy，覺得自已適應能力好好，但都覺得自己唔係咁易適應呢間公司喎。 所以有啲HR好怪，你點講都得，或者點講都死。 」
- 「就算唔轉工（低級職員），對公司忠心，不過跟錯老細無得升，想轉工，人哋覺得你幾年無升過職，對你既工作能力都有疑問，未必有面試機會」
- 「魚不過塘不肥，長時間在—家公司，人工加極有限，無新鮮感；跳吓槽，人工可以加多啲，當然係那邊人工高才走啦，可以學習多啲嘢！」
- 「如果真係做到轉工次數多同愈來愈高人工，某程度上表現一定好唔錯，其實係好事。」
- 「2至3年轉一次合理，1間公司都唔想留一個人太耐，好似畀佢養老咁；5年都唔轉一次，𠵱個人好忠心但能力一定有限，請返來養老」
「請教過高級HR，jumpy與否要睇你性質。如果係由assistant升officer跟著轉工，再由officer升senior再轉工，senior再升去Manager grade，咁樣跳絕無問題，除咗肯定工作能力，仲可以話對嗰行經驗豐富。
以上講緊係同一行，而唔係餐飲轉文員，再轉marketing，然後轉HR咁樣跳。識得有人喺同一間無任何前途可言嘅公司做10年，就算唔jumpy，轉工時HR會點諗?」
網民：解釋得到就得啦
有網民直言，大多公司看重個人工作能力，而非轉工次數，又有人認為只要能解釋轉工的理由即可。
- 「有人請嘅話，真係無咩所謂」
- 「只要解釋得到就得啦，來來去去都係嗰幾個答案，公司距離屋太遠、公司發展未如我所想、自己想有更多發展學習不同層面知識」
- 「公司只會介意你能力有幾高」
起碼要做夠3年先至好轉工？
網民對於打工仔應否經常轉工持兩極意見，有人則解釋人指大部分職位請人要求有三年以上的經驗，因此就算有轉工的打算，起碼應做夠2至3年才走。
- 「需要按情況而定。一般3年轉一次係ok的。一年半載就轉一份，HR都知咩事！」
- 「不論什麼公司！都想員工是有心做長嘅！交接工作點好，都會對公司有捐失！我個人請人要有3年以上的人！一個打工仔入一間公司短年資都係掂皮毛嘢！一年兩年貨仔嘅打工仔，你話處理過好多嘢，見過咩世面都係假！」
「我轉工覺得幾方面，首先如果幾個月跳一次，每年跳一次就Jumpy，而兩三年跳一次好正常，證明𠵱個人能力係唔錯；人工問題，一間公司長做高極有限；公司問題，例如走下坡，冇前景；老闆問題，有啲老闆初頭OK，後來不知所為；想轉行。
所以要看情況，都係嗰句有穩定邊個唔想穩定，遇到好公司好老闆人工未必高，但你可以安穩；遇到啲衰老闆人工亦都未必高，打工都係看彩數，有幾多人工高公司好老闆好？」
網民：開心最緊要
然而，網民指打工仔不應受外界影響，應衡量現階段的工作情況，以及個人需求再作轉工的決定，最重要是開心。
- 「邊樣令你做得開心最緊要」
- 「想轉工就轉，要自由點。」
