【診所職場事｜寶豬趣聞】無帶身份證嘅先生｜珍寶豬
廣告
有日一位後生仔嚟到診所。
佢企咗喺登記處前唔出聲,我:「係咪未睇過呀?係嘅俾身份證我登記呀」
佢呆呆的:「我冇拎身份證,上次去完旅行漏咗喺女朋友度」
撰文：珍寶豬（funnyclinic）｜圖片：電視截圖
先生無帶身份證嚟睇醫生
我:「你要唔要病假紙收據呀?」
佢:「要呀,我係為病假先嚟睇醫生」
我:「ER…你喺度未睇過嘅話,要身份證明文件登記呀,你一係返屋企拎Passport俾我登記?一係去你睇過嘅診所睇呀?」
佢:「我唔係住呢頭呀」
你冇身份證仲走咁遠嘅…
我:「我呢度唔可以出病假紙收據俾你呀,要有身份證明文件登記先可以出到俾你」
佢:「你俾張紙我呀」
我俾咗啲碌醫療卡單嘅廢紙佢。
佢望望:「有冇大張啲呀?」
我:「你要嚟做咩呀?」
佢繼續呆呆的:「大張啲呀」
我俾咗張A4紙佢,佢拎去坐位嗰邊,搵本雜誌墊住,佢自己開始寫嘢~
過咗陣,佢行埋嚟,俾返張紙我:「身份證」
…紙上有個長方形框框,框內資料係身份證入面嘅資料…
佢:「我唔記得個電碼係咩,仲有個唔知咩日期,大概係咁啦」
我:「…ER…先生,我哋咁樣唔當係身份證」
佢仍然呆呆的:「點解呀?」
我:「因為呢張你自己寫嘅唔屬於正式證件」
佢:「我自己寫得晒啲嘢出嚟都已經係我自己啦…」
我:「唔得呀,如果你要病假紙收據嘅，我哋就一定要真正嘅身份證明文件,或者你可以照睇咗先,之後補返證件俾我哋,我哋先俾病假紙收據你」
佢:「我都唔係住呢頭,我未必再返嚟喎」
我:「咁真係唔得啦,你返去住嗰邊先再睇醫生啦」
佢:「我趁自己仲有錢想睇埋醫生啫」
我:「好好留返啲錢,返到屋企附近再睇呀」
佢呆呆的望住我,諗咗陣:「哦」
之後離開診所了。
你係咪飲醉酒嚟咗呢頭呀?
