15間公立醫院再「逼爆」 護士：我都係人 點解要畀你侮辱
撰文：浩德 ｜ 圖片：新傳媒資料室、unsplash
公立醫院護士的自白
公立醫院持續「逼爆」，本身工作量已超大的醫護人員固然是首當其衝嘅「受害者」，工作壓力可想而知。
其實醫護人員都係人，同大家一樣都係打份工，大家面對醫護人員時，有時可以加一分體諒。
大家不妨花少少時間睇下以下呢位白衣天使嘅自白：
「好多人唔知護士其實都係人嚟，而人係要食飯。
有時啲家屬喺醫院餐廳見到你，都會走嚟問長問短，我知你哋擔心，但其實我哋本身食飯都要趕頭趕命。
仲要遇著你哋問極都問唔完嘅人，真係汗水眼淚都心裡流。」
辛酸1：食飯時間都無
仲要有時唔止係問啲同病情有關嘅問題，有同事就試過有個家屬走嚟問佢啲私人問題，幾歲呀？邊度畢業呀？入咗行幾耐呀？甚至人工……
原來想搵你同佢個仔相睇。同事避而不答結果被鬧「懶巴閉」。
其實我哋醫護人員雖然一日chur足咁多個鐘，但都係suppose有點點私人時間。
特別係如果你見到我哋仆緊落canteen，唔該唔好再截停我哋！因為醫院canteen唔係開24小時架！
你截一截，我就要焗住去食杯麵或者咬三文治……
點解之前見到救護員半夜去買外賣呀？唔係貪方便揸救護車呀，係因為我哋係人而人要充饑！
如果唔係咪唔夠力救你哋呀！
家屬們，請你哋唔好乜都話係醫療事故。
辛酸2：硬食死貓
明明同事已經向你交代咗個病情唔樂觀，但你就即刻兇神惡煞咁問係咪醫療事故，話自己畀得起錢，點解唔開特敏福。
唔知幾時開始喺大部份嘅市民心目中，特敏福變咗神藥，頭暈又嗌特敏福，抽筋又嗌特敏福，就嚟連扭親都嗌特敏福……
其實之前都有同事喺網上公開為醫護澄清過，特敏福唔係咩靈丹妙藥，而且佢嘅副作用好大，未到最後一刻都唔會亂用，正如你都唔會因為便秘而入院切咗條腸啦係咪呀？
醫護面對病人家屬討論病情轉差時，唔係真係隨口up。
之前有位L醫生話我哋有時唔敢同家屬講病人病情轉差，係因為佢呢啲咁嘅高層根本唔知下面發生咩事！
咩唔敢講根本係無可能，我哋日日見慣生死，從來堅持坦誠，邊有話咩唔敢講吖？
只係有時報危後，有啲生命力強嘅病人捱得過，明明就係一件天大嘅喜事，但偏偏有啲家屬唔會開心咗先，而係第一時間去鬧啲同事，話我哋嚇佢、亂咁講嘢、差啲害死佢。
唔該，我哋從來無否定奇蹟嘅存在，點解救返又要畀你鬧、救唔返又要畀你鬧+投訴？
辛酸3：祖宗十八代被問候
呢個世界人權泛濫，依家啲病人都好識講人權。明明手術前唔可以食嘢，就話你虐待佢要投訴。
用緊氧氣罩，話要拖住舊嘢落去行吓，阿生，你知唔知舊嘢唔係無線供電架？你點落lift呀？
唔畀你去，仲話我哋禁錮佢又話要報警咁，仲鬧爆你祖宗十八代。
其實醫護雖然向你提供緊醫療服務，但其實我哋唔係服務性行業！就算係，都唔代表可以畀你侮辱！
我哋可以告返你，只係如果真係每一個醫護都要告嘅話，我驚排到十年後都未完相關案件！
