診所職場事【寶豬趣聞】好急呀｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

診所中嘅一個家庭

媽媽：「遲唔去早唔去？睇埋先準去呀！」
仔：「我好急呀！」
媽：「冇得去呀！唔好扮嘢呀你！睇完先去呀！」

仔：「我想瀨呀」
媽：「你咪瀨囉」
…有冇人諗過我哋做診所嘅感受？如果佢瀨咗，你抹返乾淨佢的話，我真係唔介意。

唔畀阿仔去廁所

仔：「唔得呀！我真係好急呀！」
媽：「又急咩嘢呀！」
仔：「屎呀屎呀」
媽：「冇呀！唔去呀！」
爸：「你同佢去廁所先啦，我都要睇呀嘛，我入去睇先咪得囉，一陣叫姑娘俾返你哋入去睇就得啦」

阿仔忍唔住 喺診所瀨咗

媽：「你真係唔駛理佢㗎，佢次次都係咁㗎」
仔：「唔得啦，我真係要瀨啦！」
就係呢句…仔仔講得出做得出真係瀨咗。
媽見到咁大嗌：「又係咁！你次次都係咁㗎喎！」
…原來次次都係咁呀？會唔會係次次佢都急屎，你次次都唔理佢呀？

媽望望我：「喂，姑娘，佢瀨咗呀！呢度都有呀！你有冇廁所呀？」
我：「洗手間要出去先有…你同佢去洗手間先啦」
媽：「老豆行啦！出去啦！你去買條褲返嚟呀！轉頭先再返嚟睇呀」
佢哋一家三口咁就離開咗診所…再冇返過嚟。打電話俾佢哋都唔聽…
你哋專登嚟診所瀨屎㗎？