診所職場事 【寶豬趣聞】照肺前要去廁所先？｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

太太：照肺前要去廁所先？

我：「你可以轉頭先去照肺呀，唔急嘅，你去到化驗所登記排隊就有得照㗎啦」
佢：「即刻我可以去埋廁所先照？」
我：「梗係啦，我哋診所冇同你約時間㗎，你鍾意幾時去都得㗎」
佢：「咁就好，我仲驚佢哋會照到啲核突嘢」
我：「核突嘢？」
佢：「嗰啲呢…」

照肺係睇個肺有冇花

我：「照肺係想睇吓你個肺有冇花，正正常常係唔會照到咩核突嘢嘅」
除非你個肺入面住咗隻異形。
佢：「唔係會照得清清楚楚，入面有咩都睇到㗎咩」
我：「你而家照肺咋嘛」
佢：「係囉，咁睇唔到我未去廁所㗎咩？」

我成臉黑人問號：「肺喎？」
佢：「係囉係囉，我自己都覺得有一咋嘢堆咗喺度，食完嘢出嚟嗰啲呢～咁照唔到㗎咩？」
屎呀嘛？你啲屎佛地魔嚟㗎？唔可以直接提起佢㗎？
我：「…應該難囉，你照肺咋嘛，肺係喺上面」
佢大感驚訝：「唔係同一part嚟㗎？」
我：「唔同嘅…一個上，一個下」
佢：「化驗嗰度唔係成個人咁影相㗎咩？我成個人嚟㗎喎，點拆上面呢度嚟影呀？」

太太以為照肺會照埋呢樣嘢⋯

我覺得太太你真係好可愛啊。
我：「佢哋有儀器嘅，你企喺度將心口呢part痴埋個儀器度，咁就影到個肺㗎啦」
佢：「我企喺度…都係成個人企喺度㗎，咁唔係影晒成個人咩？」
我：「…嗰個儀器淨係得大概1/3咁大㗎咋，照唔晒成個人嘅」
佢：「吓？咁度縮㗎？咁係咪計我1/3價錢㗎？」

我：「如果要照晒全身，好貴㗎～而家都係收你二百幾啫」
佢：「咁照唔到嗰啲嘢㗎可？」
我：「我哋今次主要係想睇你個肺～其他部位係睇唔到嘅」
佢：「咁我唔去廁所住啦喎，我未想去住呀，嗱，我哋講好咗㗎啦，你唔可以偷睇我嗰堆嘢㗎」
我似想專登睇你堆屎嘅人咩…