診所職場事 【寶豬趣聞】香水 ｜經一專欄｜珍寶豬

有位先生一入到嚟診所，即刻閂門彈返出去。我以為佢想用黑旋風對抗香港腳，於是我冇理佢冇再望個門口。
電話響起，我：「你好，乜乜診所」

撰文：珍寶豬
佢大嗌：「我喺出面呀」
我聽到電話有聲，門外又有把聲同步，應該係頭先位先生：「你做咩唔入嚟講呀？」
佢又大嗌：「你入面好臭呀！」
我：「臭？」
佢大嗌：「邊個八婆啲香水成枝餿水味呀？」
我望望坐喺出面嘅病人，見到有位小姐望向門口位…小姐應該都聽到門外嘅先生講嘢。
我：「先生，或者你可以遲啲再過嚟嘅」我將聽筒放到遠一遠，睇吓係咪真係唔聽電話都可以聽到。

診所門外傳來『你嗌個八婆走先啦，我趕時間呀，我一陣仲要返工呀，拖佢走啦咁臭！』
啊，又真係聽得幾清楚喎。
我：「喂？先生呀？你其實講電話可以唔駛咁大聲嘅，我喺診所入面唔用電話都聽得好清楚你喺出面講咩啦」
對號入座嘅小姐企起身望望門口，再行出去…
電話中我聽到小姐問先生：『你話邊個八婆呀？係咪我呀？』
先生支支吾吾：『唔唔唔唔係呀』
小姐：『唔係？你好明顯話緊我喎，餿水呀？』
先生：『我我我唔係話你』
小姐：『咁你講清楚話緊邊個呀』
先生：『我…我…嗄嗄嗄嗄』
嘟…….電話被CUT線了。
我即刻行出去望吓咩事～我見到兩個奔馳中嘅背影…

一段可歌可悲嘅愛情故事，大概在萌芽了。