【診所職場事｜寶豬趣聞】要醫生罰抄嘅小姐｜珍寶豬

佢直接行去醫生房門嘗試推門入去，但門係鎖住嘅，於是佢望向我大嗌：「開門啦！」
我：「小姐你要睇醫生嘅話埋嚟登記呀」
佢：「我唔駛睇醫生呀，我要佢寫幾隻字咋」

撰文：珍寶豬（funnyclinic）｜圖片：電視截圖

「佢就咁抄一次啫，唔係仲方便咩？」

咁咪即係睇醫生囉？
我：「你要醫生做任何嘢都要登記呀，你埋嚟登記先啦」
佢繼續企喺醫生房門前嘗試推門。
我：「小姐你點推隻門都冇用㗎，你要醫生同你寫啲咩呀？」
佢終於俾我嘅真誠打動咗，腳底嘅AA膠都溶咗，佢行埋嚟登記處，喺手袋入面拎咗幾張紙出嚟。
我望望啲紙：「呢啲病假紙唔係我哋診所㗎喎？」

佢：「sample嚟」
我：「咁我哋醫生有咩幫到你呀？」
佢：「佢照住抄一次得㗎啦」
點解要咁做呀？做咩要醫生罰抄呀？
我：「抄？醫生唔會㗎喎，你要拎病假紙就睇醫生啦，醫生覺得你有需要先會寫俾你㗎」
佢：「我有晒sample喺度都仲要睇咁多餘？佢就咁抄一次啫，寫幾隻字咋喎，唔係仲方便佢咩？」
最方便最唔多餘嘅就係你而家立即現在離開診所，門口嗰邊，請～
我：「醫生寫病假紙唔係要方便嘅，你要睇醫生嘅就拎身分證俾我登記啦」
佢突然起跑：「你想借頭借路報警呀？要知我身份？我唔會中計㗎！」
說時遲那時快，佢已經飛咗出診所。

原來咁就可以好方便地請走你～早講嘛，早知我早啲提「身分證」呢樣嘢啦……

延伸閱讀：【診所職場事｜寶豬趣聞】小姐以為自己係VIP｜珍寶豬

延伸閱讀：【診所職場事｜寶豬趣聞】想要維他命Sample嘅小姐｜珍寶豬