【診所職場事｜寶豬趣聞】請病假去旅行的小姐｜珍寶豬
廣告
距離收工時間尚有半個鐘! 電話響起~
我:「你好,乜乜診所」
對方係一位女士:「喂?診所呀?我架機啱啱LAND咗啦!」
撰文：珍寶豬（funnyclinic）｜圖片：電視截圖
小姐請病假去旅行
恭喜你成功著陸!
我:「我哋仲有半個鐘閂門啊」
佢:「我知呀,所以我咪打過嚟囉,我成日嚟睇啦,你開幾點收幾點我知呀,我而家先LAND咋,班機DELAY咗呀,我應該趕唔切嚟」
咁即係大家都冇嘢好再講啦,我可以收線嗎?
我:「閂門前趕唔到嚟登記嘅話,你或者去搵過第二間睇啦」
佢好大聲咁嗌出嚟:「我唔係趕唔到嚟呀!我想趕過嚟!前面班人阻住我落機呀!」
你驚唔驚你咁大聲嗌,反而會挑起前面啲人更加想阻住你嘅意慾呀?
我:「我知你想嚟,但係我哋醫生都係會準時走,所以你唔好專登趕過嚟啦,直接睇吓邊間診所仲有得睇呀」
佢又好大聲:「唔得呀!我同公司報咗假係你診所名呀!」
咦,你都未睇醫生,又點解會一早報定病假紙俾公司請假嘅,唔通你係未來戰士?
我:「我哋都唔會因為你自己同公司報咗而等你啊,你同返公司解釋啦」
佢:「我今朝未返嚟呀嘛,我打去報假仲喺日本食緊海膽,我點過嚟呀?咁我係嚟開你哋度睇嘛,咪報你哋囉!」
啊,又係一個去旅行請病假嘅人啊,你就爽啦,有海膽食~我而家食緊屎咋。
我:「你自己同公司報嘅係唔關我哋診所事嘅,係你未拎到病假紙就報俾公司知啫」
佢:「我咁夜返嚟仲點報呀?你係咪未做過大公司呀?」
佢疑似拎遠少少部電話,向機上嘅人大喝:「前面班人可唔可以郁呀?唔郁嘅就死落機啦!」
嘟。
佢CUT咗我線,我想問唔郁又可以點樣落到機呀?好矛盾嘅動作題啊。
