診所職場事 【寶豬趣聞】葡萄熟透時｜珍寶豬｜經一專欄

好無聊嘅佢唔篤吓電話，選擇將眼光放喺其中一對等緊拎藥嘅母女身上。
我唔知佢係咪太唔舒服引致神智不清，佢居然好大聲咁問媽媽：「你幾歲呀？」

撰文：珍寶豬｜圖片：電視截圖、unsplash

媽媽望望診所四周都冇其他病人，就同小姐講：「你問我？」
小姐態度好差：「梗係問你啦」
媽媽：「我點解要答你呀？」

小姐：「你生件嘢出嚟嗰陣夠十六歲未呀？」
咩嘢叫生件嘢呀？
媽媽掩住囡囡耳仔：「關你咩事呀？」
小姐擺出一副不屑樣衰樣：「淫婦」

哇～你荷爾蒙失調呀？
我出口阻止：「阿小姐呀，麻煩你靜少少呀，你咁樣會影響到醫生睇症㗎」
小姐死啄住媽媽：「你腦筍都未生埋就生件咁嘅嘢出嚟，你唔自愛俾人搞大個肚呀？」
小姐～難道你在葡萄人家有愛X嗎？

我：「阿小姐呀，其實人哋係點唔關你事㗎，你係嚟睇醫生㗎可？你可唔可以靜少少呢？」
我同媽媽講：「可以攞藥啦」
媽媽一路攞藥，位小姐就一路係咁望住人，上上下下掃瞄咗好多次咁～
媽媽離開後，小姐蹺埋雙手自話自說：「就係呢啲女人，俾人以為我哋係亂咁嚟嘅人，書都未讀好就俾人搞大個肚呀，呢啲人去第二個國家俾石頭監生擲死㗎咋」

我都廢事啋佢，反正媽媽走咗就由得佢自己自high…
佢繼續唔忿氣講：「呢啲十幾歲淨係識用個懶係青春嘅肉體去勾引人㗎咋，冇內涵！垃圾！」
我望望小姐個排版，可能明佢點解咁嬲，放過自己啦～你自己都曾經十幾歲過。