診所職場事 【寶豬趣聞】生日放假｜珍寶豬｜經一專欄

佢行埋嚟登記處問我：「係咪睇完有醫生紙呀？」
我：「醫生認為你嘅病需要放假休息就會寫病假紙俾你～」
佢：「我要放呀」

撰文：珍寶豬（funnyclinic）｜圖片：電視截圖、unsplash

我真係好需要生日放假

我：「你俾身分證我先啊，我同你登記～」
佢拎出身分證，我登記緊時佢問我：「生日嘅話係咪都有得放？」
我哋係診所喎？唔係你公司啊？你公司冇生日假都唔關我哋事㗎？
我：「我哋冇呢啲㗎，要係病先會需要放假休息」

佢：「我知，但係我生日真係好需要放假」
我：「呢個你可以自己同公司拎假啦，年假都得～病假唔係咁用嘅」
佢細細聲：「咪又係假…」

其實我聽日生日㗎啦

我冇理佢繼續登記。
佢再問：「其實我聽日生日㗎啦」
我抬頭：「嗯？生日快樂」
佢：「我上年專登隱藏咗Facebook個生日日期…」
所以呢？IT嘢搵返IT部同事好冇？

佢繼續講：「跟住冇咩人記得我生日，上年冇咩人同我講生日快樂，我今日係咪應該開返個通知呀？咁啲人俾我提一提先會好似你頭先咁同我講生日快樂」
我：「…咁…我覺得呀～我覺得有真正記得你生日嘅人已經夠㗎啦，如果嗰啲係要靠上網先記得你生日嘅，可有可無啦～對佢哋嚟講都只不過一句文字咋嘛…」
佢：「冇咩人同我講生日快樂嘅話，我唔想返工，我想抖幾日散心…」
我：「不如咁啦，你有咩唔舒服嘅，一陣直接同醫生講啦，寫病假同睇你嗰個都係醫生嘛～你俾埋電話同地址我，我就登記完㗎啦」
佢寫低電話地址後，我俾返張身分證佢：「得㗎啦，登記完㗎啦，你坐低等等啊」

生日冇假放過得好唔開心

佢：「我好唔好開返個Facebook生日呀？」
我：「你自己諗吓需唔需要啦，覺得令自己開心啲舒服啲嘅咪開返囉
佢：「生日冇假放過得好唔開心㗎…」
…我唔出聲啦～
最後小姐應該生日過得唔開心，醫生唔肯寫病假…