診所職場事 【寶豬趣聞】關心你｜雙糧｜珍寶豬｜經一專欄

撰文：珍寶豬（funnyclinic）｜圖片：電視截圖、unsplash

姨姨勁關心做診所嘅我

我：「做咩咁問嘅」
佢：「我都有個女嘛」
我：「哦～你個女都想做診所呢行呀？」
佢：「做診所呢啲都好過做廢青呀」
…你係讚緊定彈緊呀？
我：「哦…」
佢：「你哋係咪會全家都睇醫生免費㗎？

花紅雙糧？員工購物優惠？

我：「冇呀，不過我唔知其他診所有冇咁嘅醫療福利，你可以去留意吓啲請人廣告嘅」
佢：「哎呀，我仲以為包全家生養死葬，原來而家冇呢支歌仔唱啦？
閣下肯定好想自己冚家…啦。
我：「…」
佢：「咁係咪員工購物優惠呀？人工有幾多呀？放假放幾多日呀？都係唔好問放假，放得假多人就懶。有冇花紅雙糧呀？」

嚟診所睇醫生定見工？

你究竟係嚟診所係睇醫生定嚟見工呀？
我：「阿姨，我哋呢度而家唔請人呀，如果請嘅話，我哋會貼紙出去，你經過開可以望望我哋有冇請人，到請嗰時先問都未遲呀」
佢：「你而家逗緊幾錢人工呀？你有冇花紅雙糧㗎？」
我笑笑：「呢啲嘢唔好講唔好提啦」
佢一臉嚴肅：「我想知喎」

做診所有幾錢人工？

我都一臉繃緊：「我唔想俾你知」
佢：「個女話俾阿媽知自己有幾錢人工有幾閒呀？你驚死你阿媽會食咗你隻車咩？」
我：「你都唔係我阿媽」
佢好似終於知道自己唔係大眾媽媽：「咁我可唔可代你阿媽問呀？」

唔駛你關心我幾錢人工

我低頭做自己嘢：「唔可以」
佢發晦氣：「我個女做廢青都好過做你呀！起碼佢咩都會答我先啦！關心吓啫」
你關心自己個女得㗎啦，我唔駛你關心～謝謝你～