【診所職場事｜寶豬趣聞】渴望被關心的小姐｜珍寶豬

我同佢講:「你排二十二,你可以預返兩個半鐘左右返嚟呀,返咗嚟話聲我知~」
佢望住電話:「嗯」
之後佢離開咗診所。

撰文：珍寶豬（funnyclinic）｜圖片：電視截圖

小姐登記完 到天黑都未返嚟睇醫生

到我哋LUNCH TIME都到,小姐仍然冇返嚟。
等吓又等吓,登記完一輪又一輪嘅人,天都準備黑,佢仍然冇嚟到,於是我就取消咗佢個登記。
到七點幾時,佢終於返嚟啦!
佢行埋嚟登記處:「喂,而家幾點呀?我仲要等呀?唔係就收工啦咩?」
我都做到呆呆滯滯:「係呀,就收工啦」
佢:「咁我呢?我仲未睇喎!」
我:「你係今朝嚟登記嘛?我見你咁耐都冇嚟,取消咗登記啦,你而家要排過啦,你俾多次你身分證我呀」

佢:「有冇搞錯呀?我等咗好耐啦」
我:「我今朝應該有同你講預返幾耐再返嚟?」
佢:「冇呀!你都冇叫我返嚟!我電話冇響過呀!」
我:「我哋唔會打電話嗌你返嚟,登記之後我哋會講俾你知大概預等幾耐,你再過嚟等咋」
佢:「你見我冇出現咁耐唔會擔心我係咪有咩事咩?」
…你呢句係咪同男朋友講嘅對白嚟?
我:「我哋平時診所咁多人出入..有時啲人見等得耐登記咗,去第二間睇都唔奇嘛」
佢:「你都至少關心吓我呀」
我:「er…好嘅,係嘅,你而家係咪都要睇呀?係嘅就麻煩你俾多次身分證我呀」
再一次登記後,我:「今次唔駛行出去啦,你坐低喺度等啦,唔會等好耐」

佢邊行邊講:「我要出去呀!你記住打俾我呀!」
睇嚟小姐真係好渴望被關心…
到差唔多嗌到佢名時,我打俾佢:「喂?小姐?可以返嚟診所啦就到你啦」
佢:「隔離冇咩人我過咗去睇啦」
嘟。
小姐cut咗我線。
你話呀,我幾無謂幾多餘呀~

延伸閱讀：登記睇醫生｜珍寶豬

延伸閱讀：請病假去旅行的小姐｜珍寶豬