【診所職場事｜寶豬趣聞】拎底褲嚟睇醫生嘅小姐｜珍寶豬

經一編輯部

職場

Jan 2 2020

珍寶豬診所職場事經一專欄

有日一位小姐嚟到診所。

佢將一個透明保鮮袋放喺登記處枱面…
我見到袋入面嘅似乎係一條T-Back…

撰文：珍寶豬（funnyclinic）｜圖片：電視截圖

小姐拎條底褲嚟睇醫生

我決定屬牛屬馬扮睇唔到條底，好淡定好冷靜問：「小姐係咪睇醫生？睇過未？」
佢：「曾經有睇過，我今次嚟睇新嘢，唔係睇以前嗰啲！」
我：「麻煩你俾一俾你身份證號碼我呀！」
佢：「XXXXXXX」
我搵到佢排版後：「登記咗啦，你要唔要探熱呀？」
佢：「探熱就唔駛㗎啦，我都係想嚟睇吓係咪佢（指底褲）整到我敏感㗎啫！」
我：「哦…咁你坐低等嗌名呀！」
佢翻我白眼：「我咁樣點坐呀？」

都係一句啫，我呢啲職業病嚟，體諒吓呀。
我：「咁你等等呀！」
佢行開少少，蹺埋雙手，不過袋嘢佢就冇拎返走…
我唯有同佢講：「小姐呀，袋嘢你可以袋返先啊！」
佢：「直接PASS俾醫生。」
我唔想掂啊…
我：「如果你要俾醫生睇嘅話，你直接俾醫生得㗎啦！」
佢：「你驚咩啫，我有事啫，你怕咁樣都惹俾你呀？佢喺袋入面呀，你驚啲咩啫？」
我：「我意思係你自己拎返，我哋唔幫你KEEP㗎，你要俾醫生睇就自己拎返啦！」
佢『嘖』一聲之後行埋嚟拎返佢袋嘢，不過佢唔係收好佢袋嘢…而係企喺我面前，打開個保鮮袋，拎條底褲出嚟…

佢喺度揚緊條底褲：「你咁驚呀嘛？」
我：「…小姐你冷靜啲啦，嚟睇醫生啫！」
佢再揸住條底褲係咁來回捽自己手臂：「有啲咩呀？你掂咗有咩事呀？我咁樣都冇事呀！」
…我唔知你咁做有咩意義，我淨係覺得有啲核突，希望你條底係有洗過先拎嚟。
我：「係嘅係嘅，你袋返好佢先呀，一陣有其他人嚟到見到你咁唔係好咁呀！」
佢望望門口，袋返好：「冇嘢好驚啦？」
我而家唔係驚你條底，我係驚你個人咁跳脫…
我冇出聲。
轉頭醫生嗌佢名，佢入房後冇耐就好快出返嚟。
佢經過登記處時將佢條底再一次放喺枱面：「醫生嗌我唔好再著，呢個你掉咗佢啦！」

…點解你唔搵醫生掉呢？