【診所職場事｜寶豬趣聞】拎人哋張醫療卡用嘅小姐｜珍寶豬

佢拎出一張醫療卡放喺登記處枱面～
我：「用醫療卡嘅麻煩俾埋身份證我呀！」
佢好大反應：「咩嘢身份證呀？點解要身份證呀？後面咪有張LABEL係你哋痴落去囉！」

撰文：珍寶豬（funnyclinic）｜圖片：電視截圖

醫療卡只限持有人用？

你所指嘅LABEL係方便我哋搵排版嘅號碼貼，並唔代表你～
我：「我哋用醫療卡係要睇埋身份證嘅，因為我哋要確認返係本人嚟！」
佢靜咗，拎返張醫療卡轉身離開。
轉個頭佢又再返嚟，問我：「我打過去問佢哋冇話要我俾身份證出嚟喎，你有咩權可以咁無時無刻要我嘅身份證呀？」
邊有無時無刻呢，淨係得此時此刻咋嘛。

我：「小姐，我哋要確認你係醫療卡嘅持有人，所以先要你嘅身份證，你冇帶身份證嘅話，有冇其他身份證明文件？或者我對一對個名就得㗎啦！」
佢：「冇呀！」
咁奇？同名嘅信用卡銀行卡都有張卦？
我：「張醫療卡係咪你本人㗎？」
佢：「係呀，唔係我嘅，你係咪唔睇呀？」
做咩突然咁坦白呀？邊個偷偷地塞咗個誠實豆沙包俾你食呀？有豆沙包食做咩唔開心SHARE一齊食呀？
我：「如果張醫療卡唔係你本人嘅就唔可以用啦，你要睇醫生都可以睇，不過你就用唔到醫療卡，需要俾現金～」
佢：「你會唔會太多事呀？我用我屋企人張醫療卡嚟睇，你會蝕錢㗎咩？」

其實又真係唔會嘅，不過你做到咁揚，我又好難扮睇唔到，點知你係咪陰我㗎？
我：「或者你自己打電話去問吓醫療卡公司俾唔俾你咁用啦」
佢又轉身離開。
今次佢冇再返嚟，可能醫療卡公司已經成功拆彈。

延伸閱讀：撕爛病假紙嘅先生｜珍寶豬

延伸閱讀：以為自己好靚仔嘅先生｜珍寶豬