診所職場事 【寶豬趣聞】忽高忽低 | 珍寶豬 | 經一專欄

我：「你好～乜乜診所」
對方電話背景聲音好嘈，佢：「喂？係咪乜乜診所呀？」

撰文：珍寶豬｜圖片：電視截圖、unsplash

我：「係呀，你可唔可以去個靜啲嘅地方再打嚟呀？你嗰邊有啲嘈呀？」
佢：「我喺XXX（遊樂場名）呀！」
哦，玩得開心啲呀，我想收線。

我：「…請問有咩事呢小姐？」
佢：「唔好嗌我小姐，我做咗人老婆做咗人阿媽啦」
都係一個稱呼啫。

我：「請問有咩事呀？」
佢：「我個女爭少少高呀」
我：「喂？唔好意思，聽唔清呀，你可唔可以講多次呀？」
佢：「我個女呀！爭少少高呀！玩唔到啲機動遊戲呀！」
咁關我咩事呀？

我：「哦…咁呀，高度唔夠冇得玩㗎，安全嘛，等高啲先再玩啦」
佢：「我唔係打嚟聽你講廢話㗎，呢度啲職員咪又係講呢啲廢話！」
咁你有冇興趣聽啲新穎些少嘅說話？『衰婆，唔夠高就唔夠高㗎啦，你唔著緊你個女嘅安全，我都擔心你個女啦！玩玩吓跌咗落嚟你砌返好佢呀？你試吓唔好用安全帶玩過山車呀笨！』
我：「你呢啲事打俾我冇用㗎，我都唔可以即刻幫你個女增高㗎嘛」

佢：「你俾醫生同班廢嘅講啦，平時我個女夠高㗎，醫生都話我個女正常高度呀！今日縮咗少少咋嘛！」
冷縮熱漲啲friend嗎？唔好咁打橫嚟啦～再唔係你而家起火燒一燒熱佢，咪漲囉。
我：「機動遊戲定咗一個高度以上先俾玩，係因為要確保安全，唔係亂咁定出嚟㗎～唔夠高就係唔夠高，唔會突然之間唔夠高，就算真係，咁今日唔夠高都係唔俾玩㗎啦」
佢：「食屎呀你！」
嘟。佢cut咗我線～