診所職場事【寶豬趣聞】被HIGH死的太太 下集｜珍寶豬
我唯有繼續若無其事：「你俾你老公害死？咁我有咩可以做呀？」
佢：「你梗係同我九佢啦！」
我用前文後理推算大法，佢個『九』會唔會係『搞』呢？
撰文：珍寶豬
我：「你要我幫你搞佢呀？我做唔到呀太太～」
佢又拍枱：「九咩呀？唔係九呀，係九呀」
同樣冇分別。
我：「唔係搞？咁係咩啊～我聽得唔係好清楚…或者嗰個九字有冇啲咩類似意思嘅字呀？」
佢又諗：「投訴？律師？」
我覺得自己好似同緊人玩大電視估字咁：「咁個九….告？你要告你老公？」
佢BLING BLING眼：「係呀！就係九佢啦！」
我：「不如咁啦，我幫你報警啦，殺人填命呢啲嘢～我真係幫唔到」
佢：「咩嘢殺人填命呀」
我：「你老公殺咗你，你要告你老公呀嘛？」
佢：「佢都冇殺到我，我要你同我九佢咋嘛」
我：「即係你未死？」
佢：「我死咗點會喺度呀？姑娘，你係咪有事呀？」
哇，我成個舒暢晒呀。我幾驚你突然發爛渣變樣嚇我呀！
我：「哦！原來你未死嘅！真係嚇到我呀，你頭先係咁話你老公害死你㗎嘛？」
佢：「佢咁臭我俾佢HIGH死啦！我個鼻而家有事一定係因為佢！你同我九佢啱㗎啦！九佢俾返賠償金呀！」
我：「嗰個唔係你老公嚟咩？你告佢？你個鼻有咩事呀？一係我同你登記睇醫生啦」
佢：「錢重要過老公呀！我個鼻呀，你望吓你望吓，有鼻水呀，成朝㗎啦」
…流鼻水都要告人拎錢啊？
我：「我同你登記先啦，俾醫生睇咗咩事先啦，可能傷風啫」
佢：「好呀！佢臭到我傷風囉！同我九佢！」
好啦好啦，一陣叫醫生寫返張收據俾你，你自己去問老公拎錢啦～
延伸閱讀：
診所職場事【寶豬趣聞】被HIGH死的太太 上集
【診所職場事】有日有位太太嚟到診所～
佢行埋嚟用唔咸唔淡嘅廣東話同我講：「姑娘，你可唔可以幫我九我老公呀？」
我一頭問題：「救你老公？你老公咩事呀？佢喺邊呀？」
佢：「唔係九呀，係九～～（佢拉長尾音）」
撰文：珍寶豬
…你拉長完尾音都同樣係九啊….
我：「咁呀…你一係寫俾我呀？」
佢拎起筆眼仔碌咗兩碌，哄個頭埋嚟問我：「九點寫呀？我一時唔記得」
啊啊啊啊～
我：「唔係救呀？拯救個救喎？你個九係咩九呀？」
佢：「九佢呀」
…可能我領悟力太低～我真係悟唔出個正字呀～醫生，我想返去讀多幾年書，呢度可唔可以交俾你？
我：「九佢啲咩呀？」
佢：「九佢臭呀！HIGH死我啦！」
請問這是咸濕故事的發展路向嗎？我唔想知你有幾HIGH呀大佬～
我：「臭？邊度臭呀？你老公臭你又點解好high呀？你對臭味有濃厚興趣？」
佢死魚眼望住我：「姑娘你講緊乜呀？」
我自己都忍唔住笑：「其實我都唔係好知自己講緊乜，我都係估估吓～如果你可以寫到俾我睇應該有幫助…」
佢又拎起筆，諗咗陣，動起筆：「嗱」
我望住白紙上，一個好細嘅字…『死』，嗯～我想拍拍你膊頭鼓勵你，我知你盡力了。
我：「哦？死呀～邊個死咗呀？」
佢：「我呀！」
嗯，日光日白真猛鬼，請保持鎮定，只要唔表現出驚慌樣，佢都耐我唔何～戲教嘅！
我：「嗯～你死咗呀？你知唔知自己而家喺邊呀？你會唔會去錯咗地方呀？」
佢望望四周：「診所呀你係？」
我：「係呀，咁你嚟診所係咪睇醫生呀？」
佢拍枱表現出好焦急嘅樣：「我同你講咗好耐啦！你究竟明唔明我講緊乜呀？我俾我老公HIGH死啦！」
啊！HIGH！普通話：害！害死！
這鬼真猛啊。
延伸閱讀：
診所職場事【寶豬趣聞】成為有錢人 下回
【診所職場事】上回講到小姐終於發現自己張身分證漏低咗喺診所～佢懷疑我KEEP住佢張身分證係有不軌企圖…我對灰灰白白淨係得個頭嘅相冇興趣啊。
我：「小姐，你冷靜啲，你張身分證我已經幫你收起咗喺櫃桶，你可以隨時過嚟拎返啊」
佢：「你留起咗我張身分證，你冇俾返我，仲要我過嚟拎？我過咗對面海啦，你拎返過嚟呀！」
撰文：珍寶豬
我：「喺登記後我有親自俾返張身分證你㗎，係你走嗰時擺低咗佢喺櫈上面」
佢：「我就唔會過嚟㗎啦，我呢幾日都唔得閒囉，我都明你呢啲打工仔懶過積㗎啦，你一係就同我掉去郵筒囉」
我：「寄返俾你？你會唔會過嚟拎安全啲呀？」
佢：「就咁掉落去得啦，佢哋自然會送」
送去垃圾桶嗎？
我：「咁呀…一係你俾地址我啦，我同你寄掛號啦」
佢：「唔駛呀，你就咁成張掉落去得㗎啦！」
我：「吓？地址呢？」
佢：「我咪話咗佢哋自然會送囉，你有冇聽我講嘢㗎？」
我：「我有聽…係唔明點解唔駛寫地址就會送到去你手上啫」
佢：「我香港公民嚟㗎」
我知，如果唔係你點會有身分證。
我：「所以？」
佢：「政府有我地址有資料㗎嘛！見到我唔見咗嘢仲唔擒擒青俾返我呀？記得掉去郵筒呀！我唔得閒同你講呀！我已經俾你玩殘㗎啦」
嘟。
收線後，我拉出櫃桶望住小姐張身分證發呆。
同事問我：「做咩呀？佢幾時嚟拎呀？」
我：「佢叫我就咁掉落郵筒喎」
同事：「咪制呀！有咩事張身分證唔見咗，佢入你數㗎啦」
於是，我閂返埋個櫃桶。
小姐喺一星期後嚟到診所發爛渣，話打咗好多次電話去郵局都冇人覆到佢張身分證去咗邊…
我拉出櫃桶…surprise！佢爭啲想一巴打爆我個咀。
延伸閱讀：
診所職場事 【寶豬趣聞】 睇醫生唔俾錢
