職場如情場 打工仔同公司拍拖 必經熱戀 磨合 分手｜Purple弟弟｜職場制勝
職場熱戀期
公司就有如一個衰男人，會用盡甜言蜜語哄你開心，當下你會覺得好Sweet好有道理，當冷靜落嚟你就知道中伏了！
對新人嚟講，最常聽到嘅甜言蜜語一定係：「我哋比機會你學嘢，唔好介意辛苦。」
冷靜之後發現，其實我做乜都學到嘢，即使我如廁冥想都可能發掘到人生大道理，學唔學到嘢只係視乎自己心態，而非老細俾嘅額外工作量。
磨合期
衰男人喺未追到手前或者熱戀期，當然對個女仔無微不至。
當你喺公司一段時間後，呢段感情即將面臨真正考驗，你會發現作為女朋友嘅你默默付出，但男朋友都不聞不問。
甚至將你投閒置散，而自己就去𥄫其他靚女。
做錯少少事就發你脾氣，慢慢你都開始睇穿呢個賤男。
基於當初嘅美好回憶，始終都有少少感情，作為好女仔都會俾多次機會男朋友。
分手
可惜衰男人始終都係衰男人，男朋友眼裡已經無咗自己，只有果位冗員靚女！
今日我因為做錯咗少少嘢被「男朋友」叫咗入房照肺，不過我份人就好均真，錯就認打就企定。
點知佢好死唔死，鬧我咪算，仲要讚個靚女做得好過我十倍，作為女朋友仲點忍？
「你老＿，你數學有冇學過機會率？我做咁＿多嘢出錯機率咪多囉，佢乜都唔做咪唔＿會出錯囉！」
然後我決定同佢分手……
而賤男總在失去後先懂得珍惜，佢決定加$1,000嘅「大愛」畀我，但即使我最後肯留底，段關係就會變成建基於金錢利益之上，毫無感情可言。
咁仲叫男朋友咩？所以絕大部分人都會堅持當初嘅決定「分手」！
咁好男人同衰男人有咩分別？衰男人只會俾「利益」你，好男人會俾「未來」你！
希望大家都搵到一位職場「好男人」，喺職場上談一場轟轟烈烈嘅愛情。
相關文章：
大學畢業1年轉4次工 搵錢愈嚟愈少反而仲開心
話說最近筆者去咗一個中學同學嘅聚會，見到不少熟識的舊臉孔，而當中包括我嘅好朋友阿雞。我地互相寒喧咗幾句之後，就開始分享大學畢業嘅工作情況。
撰文：Purple弟弟 | 圖片：電視截圖、unsplash
大學畢業1年轉4次工
阿雞係大學讀啲同環保政策相關嘅學科，但同大部分嘅大學生一樣，佢自己就唔太鐘意讀緊果科，所以一直以來都奉行得過且過原則，讀完大學就算。
我最後一次見佢只係知道佢會去NGO打工。
我：「好耐無見喇，阿雞，你最近返NGO返成點？」
雞：「我無做果度好耐，我轉咗4次工，而家返緊大學嘅研究助理。」
我：「你轉咗4次工，終於入到大學度做，咁人工一定好吸引喇！」
雞：「唔係呀，咁多份工嚟講，呢份人工最低，但同時要做嘅職責亦都係最多，每日返工都無得hea。」
我：「咁你仲繼續做？你可以試下其他舒服啲又或者人工高啲嘅工，唔需要咁辛苦。」
雞：「唔係，我而家做得好開心，因為我本身想過日本發展，而呢份工咁啱就係研究日本文化，雖然人工低，但我真係每日都有返工嘅衝勁，我咁大個仔都未試過！」
聽到阿雞振振有詞咁分享份工帶俾佢嘅衝勁，我果一刻竟然對阿雞有啲陌生。
相識咗整個中學生涯嘅老朋友，我都係第一次見佢雙眼發光，而佢嘅語氣同埋眼神都好似重新灌注咗靈魂，不斷給予我一種感覺，那就是熱。
老實說，我一直以為阿雞畢業後大概也是得過且過，搵份hea工度日就算，誰不知當他遇到了人生夢想時，佢會變成超級撒亞人，為夢想跳出舒講圈。
反觀我當初dse分數比阿雞高，入到了本地最高學府，但對人生嘅熱度卻每年遞減，對份工嘅感覺根本稱不上為熱愛，也只能算是僅僅不討厭。
現在回想起來，究竟我和阿雞當初誰比較得過且過？
文憑試中考到不錯的成績，卻對未來路向全無主見，我入讀嘅大學同埋選擇嘅學科亦都係人云亦云，每個重要嘅人生決擇都在乎他人嘅價值觀同埋評論。
讀者成績不錯，但卻失去咗自己探索可能性嘅本能，從未為人生目標有過衝動同掙扎。
或許現在係時候我要重新出發尋覓理想，尋回人生中早已失去嘅熱血。
或許會有親戚及朋友問我現在開始追夢唔會太遲？
我會用《宇宙兄弟》中的一句話回答——
「第一名和最後一名其實差唔多，有沒有到達終點先係最重要。」
