【職場難題】月薪2.8萬元hea工返5日半 VS 月薪3.2萬間中要OT 如何抉擇？
撰文：經一編輯部｜圖片：Unsplash
樓主：Hea工同OT工點揀？
日前，有人於香港討論區，以「28,000 HEA 工五日半 VS 32,000 五日辛苦 OT工，點揀？？？」為題發文，指自己收到兩間公司的offer，兩份工作性質類似，同行同工，年假、病假等公司福利差不多，唯一的分別是工作日數以及薪水。樓主因而發文希望收集廣大網民的意見。
Ａ餐︰人工28,000元，返五日半，近屋企，即係星期一至五，星期六返半日，問過做過嘅朋友，工作內容都唔煩，有少少HEA，好似幾好做，至少唔會太CHUR。不過星期六要返半日真係有少少浪費時間，而且又無嘢做嘅話，真係返去坐下就算。
Ｂ餐︰人工32,000元，返五日，有少少遠，星期六日全日放假幾爽。不過見工嗰時講明有時要OT，仲可能會OT到半夜，無補水不過有的士錢可以問公司拎。勝在人工多4,000元幾好使，又可以放兩日假。
網民：梗係A餐啦！咁辛苦做咩
帖文一出，引起網民熱議。不少人認為返工最緊要輕鬆且無工作壓力，認為樓主可以先選擇「A餐」，之後再搵第二份工或在空餘時間進修。
- 「梗係A餐啦！平日準時放工 可以多啲私人時間做自己嘢，星期六都係返多半日工，星期六下午一樣可以出街玩。」
- 「帳面又真係A餐好啲，B餐講到明要OT， 除非樓主打算短炒做兩三年走人，如果唔係，都係揀A餐，之後去進修再考慮轉工啦！」
- 「A！咁都要問！繼續搵工啦！再搵一份40,000蚊又hea又返5日又唔使OT!!!」
- 「多啲時間搵偏財」
「我係你梗係揀hea工，而且仲要一邊搵第二份5日嘅工，因為返五日半都幾辛苦！要OT嘅工分分鐘要加到夜晚8、9點，仲要無飯食，餓親個胃，會捱到病！」
又有網民表示，就算「A餐」的人工較低，但勝在返工近、不用OT。有人更表示，假如選擇「B餐」要加班的話，「A餐」的時薪或許更高。
- 「當然A，咁辛苦做咩，4,000蚊做得啲咩先。」
- 「B餐OT無補水，平時又忙，唔求升職就一定要A餐。如果計埋加班啲時間嘅時薪，隨時A餐高過B。」
揀人工高嘅offer 未來轉工叫價更高
不過，有網民卻持有相反意見，認為應該要選擇人工較高的offer，樓主未來轉工，叫價可以高於32,000元。
「你要知道好多轉工睇嘅，都係依家份工嘅人工，加10%至15%走。 假設兩間公司除咗你講嘅嘢，分別不大。依家多4k，即係成世每個月多4k。揀28K兩年後搵下份工可能32k，再兩年搵下份工可能37k；揀32K兩年後搵下份工可能37K，再兩年搵下份工可能43K。當然，如果你唔在乎個幾K，想hea就另計。」
- 「多4K等於成世多4K， 所以應該揀B。 捱兩年再搵過份有人工加嘅hea工，而且5日半同5日係差好遠，5日工星期四晚已經係holiday mood，再簡單啲諗，假設你返緊份5日工，老板叫你OT，你寧願每日做夜啲定星期六返去？」
- 「一定揀32K。下次轉工可以搵36K，38K。」
有得OT等於公司發展好？
有網民表示，公司要求員工加班，代表業務發展得快嗎，有發展潛力。有人則認為hea工裁員機會大，「B餐」的選擇更加穩陣。
- 「通常hea工比人裁員機會大好多，想穩定我會揀B 」
- 「我會揀B，話哂過3萬月入！2萬8蚊人工可以有幾hea啊！」
- 「依家梗係睇邊份穩陣，有時hea未必好。」
- 「睇個人，要OT就明顯證明呢間公司發展得更快。如果你想發圍肯定揀B公司，A公司咁興鬆，證明無咩發展，自己諗。」
「如果樓主只求安穩、A係不錯，但有機會公司生意同工作量成正比，難保未來（正在可Hea，容易找人代替），之前做過呢份工那人又因咩事走，你也參考吓自己前人嘅想法；B係辛苦，但如果出咗名，你仍有心有力，這份工作經驗係未來會令你CV加分，或許你能力好、效率高不用夜夜OT！」
網民：唔應該只考慮人工
有網民則認為，無論是選擇「A餐」或是「B餐」，樓主不應只考慮人工，亦須衡量那份工作的晉升前景、公司性質等因素。
「睇下邊份有晉升機會，前途好啲。同埋睇你幾多歲，想hea做定博殺。有時唔係淨係睇錢，要計好多嘢。」
「睇個人同咩公司。如果係政府工、年紀大、有家庭所以要準時走就揀A；如果要穩定工作（如你要供樓）、想要揀大公司或好生意，A同B都得；如果鍾意5日工、要學嘢、想自我上進，就揀B（又多啲人工）。」
