職場致勝術 履歷表7大關注位
撰文：Smart ED編採部
不膠一：無懼履歷表CV變改，還是愈長愈愛？
畢業寫論文，千字文幾百頁紙，對住份CV，如果都係咁寫，勢要展示你GPA3.9的實力，咁就大錯特錯。
請你的人唔係教授，唔會用個幾鐘去研究你份CV。所以CV一頁起兩頁止就夠，最重要講做過邊份工，以及與申請職位工作性質相近的兼職、實習等。
另外，寫CV最好用簡單易睇的point form，而唔係一大段一大段文字，最重要係畀人一眼睇到你的優點，與工作相關的強項更要highlight。如果你當散文咁寫，人地唔會有時間逐隻字睇，無論你幾叻，人地睇唔到，唔想睇都係冇用。
不膠二：學校獎項、工作經驗大曬冷？
小學做過班長、中學做過學生會幹事、大學上過莊等等等等，可唔可以表現到自己有責任心、有團隊精神、主動、有禮……？
呢類咸豐年前的職位就留係回憶啦，唔需要特登搵返歌唱比賽冠軍獎杯、禮貌大使獎狀出來，咁樣只會畀人覺得幼稚，無嘢搵嘢講。你已經長大，應該講多點相關工作經驗、在該行業有乜特別技能就可以了。
另外，年少無知的你，曾經在M記做過暑期工、髮型屋幫手洗頭，工作性質與你申請份工有成個宇宙的距離，呢類工就唔好提啦。
Well，你可以話M記係美國連鎖大公司，如果你口才了得，可以講到當時已經為呢份工鋪路，咁就祝你好運，但根據經驗，一般公司管理層唔會有咁多時間睇你篇「論文」囉。
不膠三：同公司坦誠相對乜都講？
依家唔係相睇，無需要將時辰八字、星座運程、座右銘、政治取向、Facebook Account等等等，乜都同對方講。CV最好就簡簡單單，人生哲理有幾偉大，請你的人應該唔想知，都係寫返基本資料就可以，例如聯絡方法、教育、工作經驗。身份證號碼、地址等等係個人私隱，唔好亂俾人。
重有，介紹自己時記得唔好寫太多無謂「虛字」，例如：Skillful、Hardworking等等，睇上去太多水份，只會覺得你在「吹水」，一樣無運行，都係寫返實際做過的工作、識得的技能會好啲。
不膠四：用出位e-mail加深印象？
細個無聊申請的「[email protected]」、「[email protected]」呢類e-mail唔好用啦，見到只係會笑你，之後就擺埋一邊。
申請返個正常的email名，好似「[email protected]」，仲記得要用個人e-mail，唔好用學校或者你返緊兼職間公司。
不膠五：耍雜技算唔算特別技能？
其中一項寫特別技能，正常係寫識咩電腦軟件、工程牌照之類，是與申請職位有關的技能。可能你見到「特別」好開心，寫哂耍雜技、整廁所、換燈泡呢啲，不如寫埋斟茶遞水、影印達人咁，話唔定老細會畀多份糧你！（曲線要寫明）
不膠六：自拍當見工相？
根據非正式統計，有相的CV，獲邀請見工的機會係大啲，不過揀相都好重要。雖然你張Profile Pic自拍呃到成千個like，但呢類相都係send畀男神女神睇好啦，見工相都係搵專業人士影，仲要係著得四四正正，斯斯文文，除非你申請係模特兒，否則千祈唔好走在潮流尖端扮潮流教主。
仲有提提你，張相靚係會加分，正所謂「你的樣子如果，你的日子也必如何」，如果你一定要鬍鬚滿面扮浪子，咁相片都係可免則免啦，有標青的學歷同工作經驗重要啲。
不膠七：搵阿爸阿媽做諮詢人？
諮詢人唔係隨便亂搵，有人隨便搵阿爸、阿媽、朋友做諮詢人，諗住多就好。不過，親友的意見唔多客觀，一般公司都未必會參考。如果係朋友，除非是公司高層，否則找一個文員朋友做諮詢，亦唔會有參考價值。
其實諮詢最好就係搵大學教授、前僱主，客觀得來又夠權威，不過填寫之前，記住要預先徵得對方同意，否則人事部打電話去求證時，對方「矇查查」唔知發生乜事時，咁你的印象分即刻大打折扣。
