暑假搵工旺季 搵份好工無難度 完美CV 6大要訣+見工全攻略｜職場制勝
撰文：Smart ED編輯部｜圖片：unsplash｜資料來源：
搵工必備 完美CV 6個要訣
搵工前，履歷係第一印象，如果連份CV都寫唔好，唔可以吸引公司邀請你見工，咁無論你幾好口材、自問有幾多優點，間公司都係唔會知。
小編綜合坊間不同人事專家及前人經驗，得出以下七個寫好CV的心得，希望幫到各位搵工。
無懼CV變改，還是愈長愈愛？
畢業寫論文，千字文幾百頁紙，對住份CV，如果都係咁寫，勢要展示你GPA3.9的實力，咁就大錯特錯。
請你的人唔係教授，唔會用個幾鐘去研究你份CV。所以CV一頁起兩頁止就夠，最重要講做過邊份工，以及與申請職位工作性質相近的兼職、實習等。
另外，寫CV最好用簡單易睇的point form，而唔係一大段一大段文字，最重要係畀人一眼睇到你的優點，與工作相關的強項更要highlight。如果你當散文咁寫，人地唔會有時間逐隻字睇，無論你幾叻，人地睇唔到，唔想睇都係冇用。
學校獎項、工作經驗大曬冷？
小學做過班長、中學做過學生會幹事、大學上過莊等等等等，可唔可以表現到自己有責任心、有團隊精神、主動、有禮……？
呢類咸豐年前的職位就留係回憶啦，唔需要特登搵返歌唱比賽冠軍獎杯、禮貌大使獎狀出來，咁樣只會畀人覺得幼稚，無嘢搵嘢講。你已經長大，應該講多點相關工作經驗、在該行業有乜特別技能就可以了。
另外，年少無知的你，曾經在M記做過暑期工、髮型屋幫手洗頭，工作性質與你申請份工有成個宇宙的距離，呢類工就唔好提啦。
Well，你可以話M記係美國連鎖大公司，如果你口才了得，可以講到當時已經為呢份工鋪路，咁就祝你好運，但根據經驗，一般公司管理層唔會有咁多時間睇你篇「論文」囉。
唔同公司坦誠相對？
依家唔係相睇，無需要將時辰八字、星座運程、座右銘、政治取向、Facebook Account等等等，乜都同對方講。CV最好就簡簡單單，人生哲理有幾偉大，請你的人應該唔想知，都係寫返基本資料就可以，例如聯絡方法、教育、工作經驗。至於身份證號碼、地址等等係個人私隱，唔好亂俾人。
仲有，介紹自己時記得唔好寫太多無謂「虛字」，例如：Skillful、Hardworking等等，睇上去太多水份，只會覺得你在「吹水」，一樣無運行，都係寫返實際做過的工作、識得的技能會好啲。
用出位Email加深印象？
細個無聊申請的「[email protected]」、「[email protected]」呢類e-mail唔好用啦，見到只係會笑你，之後就擺埋一邊。
申請返個正常的email名，好似「[email protected]」，仲記得要用個人e-mail，唔好用學校或者你返緊兼職間公司。
耍雜技算唔算特別技能？
其中一項寫特別技能，正常係寫識咩電腦軟件、工程牌照之類，是與申請職位有關的技能。可能你見到「特別」好開心，寫哂耍雜技、整廁所、換燈泡呢啲，不如寫埋斟茶遞水、影印達人咁，話唔定老細會畀多份糧你！（曲線要寫明）
自拍當見工相？
根據非正式統計，有相的CV，獲邀請見工的機會係大啲，不過揀相都好重要。雖然你張Profile Pic自拍呃到成千個like，但呢類相都係send畀男神女神睇好啦，見工相都係搵專業人士影，仲要係著得四四正正，斯斯文文，除非你申請係模特兒，否則千祈唔好走在潮流尖端扮潮流教主。
仲有提提你，張相靚係會加分，正所謂「你的樣子如果，你的日子也必如何」，如果你一定要鬍鬚滿面扮浪子，咁相片都係可免則免啦，有標青的學歷同工作經驗重要啲。
搵阿爸阿媽做？
諮詢人唔係隨便亂搵，有人隨便搵阿爸、阿媽、朋友做諮詢人，諗住多就好。不過，親友的意見唔多客觀，一般公司都未必會參考。如果係朋友，除非是公司高層，否則找一個文員朋友做諮詢，亦唔會有參考價值。
其實諮詢最好就係搵大學教授、前僱主，客觀得來又夠權威，不過填寫之前，記住要預先徵得對方同意，否則人事部打電話去求證時，對方「矇查查」唔知發生乜事時，咁你的印象分即刻大打折扣。
見工必勝6大秘訣
CV只係博取面試機會，要成功獲得聘用，最重要是面試表現。就算你是創業做老闆，工作上亦會遇上向客戶或投資者present自己的profile。你可以將面試視為一項游說，學識當中的技巧，面試就可以如魚得水。
1. 自我介紹限制於三分鐘之內
面試就等於準上市公司搵人招股，將重點業務講得清楚明白就足以讓人信服。面試亦是一樣，只需短短幾分鐘就可以將自己的長處和重要經驗講出來，精簡最重要，多講廢話反而扣印象分。
2. 答問題前停一停、諗一諗
被問到豆腐中挑骨頭的問題時，千奇唔好一秒即答。面試的人問的問題有虛有實，難的問題多是考你臨場反應，只要冷靜，停一停幾秒，整頓好再答。停幾秒絕不會讓人覺得你無準備，反而會帶給人一個深思熟慮的好印象。
3. 留意面試官會否問廢問題
一般人都會準備普通而且最正路的問題，例如:談談你的家庭情況、有什麼業餘喜好等等，不過當你發現面試的人問來問去都是這些問題時，你就要醒覺。這代表面試的人對你沒太大興趣，換言之，你成功獲聘的機會就會減低，你要花更大的努力去吸引面試官重新留意你。
4. 將缺點變成優點
好多人好驚人問：你有什麼優點、缺點。講到缺點，多數人常常會說自己信心不足，做事不夠小心之類，不過這些說話不是面試的人想聽到。真正有技巧之作，是可以將缺點變成優點。
點 樣將缺點講成對工作的優點？首先，你要充分了解應徵的工作，知道其中的工作性質、範圍等，之後就可以針對這份工作而說出「自己的缺點」，例如: 在你調查後，知道這份工作需要自主、個人能力強的人，你便可以說你的「缺點」是向來做事都會「摺起衫袖」，太喜愛落手落腳做事，較少與人分擔工作，因我相信自己的工作會有質素保證。
這樣雖是「缺點」，但就正正是公司需要你的地方，同時讓面試官對你眼前一亮。
5. 適當地誠實，唔識扮識被拆穿就是大敗
做人最重要是誠實，誠實面對自己的實力，講大話吹噓自己唔緊要，最怕是被人拆穿，被拆穿仲衰過實力唔夠，因為你的人格在面試的人心中已經破產。
6. 運用適當的身體語言
適當的身體語言是魅力的表現，充份的眼神接觸讓人感到你的自信，手部動作更可增加與考官的互動感，同時多些身體語言可讓自己放鬆，面對突發情況都有空間處理。
