職場初哥月入$14,000 學識打工要黑口黑面
廣告
文：Purple弟弟
畢業季節過咗，各行各業都增添咗唔少新血入行，當年小弟一畢業，就去咗做一份月薪＄14,000假mt真打雜嘅伏工。第一日返工，點都有少少驚同緊張，但當我見到原來同事有唔少後生仔果陣，心中暗喜，應該可以好快熟同埋到堆！
入職一星期後，我已經憑住出色嘅社交技巧同風趣幽默嘅性格同大家打成一片，而工作都愈做愈上手，由初初要做到ot，問呢樣問果樣，依家已經可以收工前兩三個鐘就做完無所事事，有時做完咪會同其他都做完嘢嘅同事吹下水，玩下電話咁，氣氛都算良好。
直至一個月後，同當時直屬上司單對單開咗次會之後，我嘅職場價值觀被扭曲了！
「老實講，我唔係好滿意你嘅工作表現！」
我心諗，大鑊，我做錯咗啲咩呢！平時交帶落嘅工作都有完成，仲會好小心應該唔會出錯…
「我見你成日同其他同事嘻嘻哈哈，好似唔係認真做嘢咁！」
咩叫好似，依家我有嘢做唔齊咩，你個嫁唔出嘅老女人。
「你…交帶啲工作我…」
個老姑婆冇等我講完成句。
「你係完成晒，都冇做錯，但我就係唔鐘意見到你成日笑笑口咁，好似好唔認真！」
我完全睇唔明兩者有咩關係，但我終於明點解香港人個個做野都黑口黑面，原來就係因為呢啲無謂嘅偏見。
我收工走在人來人往嘅旺角，係一個垃圾桶旁，有個紋身壯嘆係到吞雲吐霧，然後師傅我明白了。雖然我哋成日企係道德高地，話咩紋身食煙唔等於衰人，但心底係咪又真係咁開明？我上司都知笑笑口做嘢唔等於我做唔好，但…邊個想理，我就係唔鍾意，吹啊？
有所領悟嘅我，漸漸收起笑容，決心做一個係香港最常見嘅物種－黑面人。
