【經一專欄】診所職場事 【寶豬趣聞】配藥 ｜珍寶豬

佢大大力咁拍張枱：「嗌你醫生出嚟！」
我：「請問有咩事呀小姐？」
佢谷氣到手震，拎出一枝藥水：「呢枝嘢！食到我個女咳呀！」

撰文：珍寶豬
我拎枝藥望望：「呢枝？收鼻水藥嚟啊，點解你會覺得係呢枝藥令到你個女咳呀？」
佢：「之前冇咳㗎佢！」
我：「你會唔會同佢嚟睇多次醫生呀？」
佢：「唔會呀！」
咁你嚟做咩呀？想我哋俾咩反應你啊～
我：「你枝藥都上個禮拜啦喎？醫生本身都係開咗兩日藥俾你…有可能小朋友而家已經唔係上次嘅問題㗎啦～」
佢：「係你哋枝藥食到佢咳㗎！」
我：「佢幾時食過呢枝藥呀？」
佢：「咪上星期囉！」

哎喲，你今年大肚會唔會都關早幾年個EX事㗎？
我：「收鼻水藥唔會令人咳嘅，有可能你個女已經係另一次病㗎啦～一係嚟睇多次醫生啦」
佢：「我話咗唔睇呀！」
我：「咁我哋有咩幫到你呀？」
佢拍枱：「開返枝咳藥嚟呀！」
我根據藥水樽上嘅覆診號碼睇睇排版：「小朋友喺度冇食過咳水，我哋冇咳水配返俾你啊，一定要嚟睇醫生㗎，睇完先可以開藥俾你」
佢：「點會冇食過咳水呀？」
我：「你個女喺度睇過一次咋…就係冇咳水…」
佢停一停：「你有咩可能唔俾咳水呀！有咩可能唔開定呀？」
我：「因為嗰時你哋睇醫生冇話咳嘛～」
佢：「細路病親一定咳㗎啦！常識嚟㗎！你哋冇仔生㗎咩？」

係啦係啦，你最叻你最勁啦，有仔生好威威啦～
我：「嗰日我哋出藥俾你都有講啲藥係食咩嘅～你都冇出聲話要咳水嘅，而家就冇得再拎返㗎啦，一定要再睇醫生㗎啦」
佢：「咁又幾錢呀？」
我：「當重新睇過咁收費啊，三百蚊」
佢：「你食屎啦！我去第二間睇好過啦！你哋都弱智㗎！」
『啪！』佢臨別都拍多一次枱。