真係差幾皮? 工廠區返工的9個無奈
1. 低人一等
我有次同親戚食飯畀人問我喺邊度返工，啲親戚一聽見你返觀塘，就以為你做藍領。仲恥笑講話「哎呀嗰頭做嘢身水身汗好辛苦架喎」，之後我話我係做寫字樓，佢哋好驚訝咁話「哎呀乜觀塘都有寫字樓架咩」，仲即刻覺得你畀返中環做sales嗰個表弟比下去。好大精神壓力呀。
2. 人工低福利差
喺工廠區開公司多數都係港資，就算係大學生，人工都係長期喺小學畢業咁嘅水平。唔好話咩一個禮拜返六日，有啲年假都係得嗰7日咋，仲邊有嗰啲乜鬼醫療福利？
3. 成日同班藍領迫埋一齊
工廠區最多咪跟車、搬貨，成日上上落落都同埋藍領迫埋一齊，唔係話睇唔起人哋，但真係身水身汗痴落自己個身度，有啲潔癖都頂唔住。。。
4. 搭貨LIFT上落
啲工廈多數都係得貨LIFT，所以返工放工都係要搭嗰啲一陣味嘅貨LIFT，同中環嗰啲燈火通明四面鏡嘅LIFT完全無得比囉。
5. 成日塞車
一大堆人由全港十九幾區湧去嗰幾個地方返工，日日返工都苦過DEDE咁等車又塞車，放工塞上嚟要成三粒鐘先返到去，唉，不要再說了。。。
6. 行人路都好塞
唔止車路塞，連行人路都好塞，以開源道為例，條路鬼死咁窄，但就幾廿萬人喺度行，特別係放工時間，馬會出面嗰個等轉燈嘅位真係煩到爆，企喺度已經足以阻住成村人，但又無理由行上天橋再過apm。
7. 空氣差
地少人多車又多，仲要特別多大車貨車，啲廢氣一噸噸咁排出嚟，戴氧氣罩都唔掂。
8. 食飯貴
唔好以為工廠區就實有平民價，明明工廈啲租咁平，但啲餐廳都仲賣成六七八十蚊一個餐，唔想咁就惟有食得好頹，去啲工廈飯堂開餐，但其實都成四十幾蚊一餐，好難捱囉。
9. 無超市
有時想買零食或者其他必需品，喺工廠區都係買唔到，因為附近無人住嘅地方亦都無超市，所以次次要乜嘢，惟有寫個list提自己第二日買返嚟，但一旦唔記得咗，個情況就要keep住輪迴到你記得為止。
