有個女朋友做空姐 其實我有我難處
文章授權：逆行@電視汁撈飯
「或者人生就好似衝上雲霄，當Sam哥同Zoe經過重重困難，最後有情人終成眷屬，你諗住大家都會開開心心生活落去。但你估唔到，佢會有第二集，而Zoe一開波仲瓜埋。
由你初初做空姐開始，我已經明白我地既關係，將會面對無盡挑戰，由出ticket等waiting既煎熬，到時差為我地帶來既阻隔，過去數年看似眾多難題我們也成功一一克服。
當我以為頭一兩年乜都捱過左，依家先發現，原來比賽先岩岩開始，我地都未對最勁個大佬－成長。而呢份工面對既，將會係更多更煩既大佬。
首先，每次有人問起知道你又飛左，諗住除左同我講恭喜之外都唔知講咩好，可以自由自在咁花天酒地，由初時我也享受這份無拘無束，一兩年後真真正正感受到你有你既生活，我有我既忙碌，就算大家都無關節痛，但連一個星期六的約會，也要等到三星期後才能成功，每份失落原來也在累積。
不過我們也長大了，家人也徐徐變老，自然想有更多時間陪伴屋企，眼見你連自己家人亦要取捨，留家團年還是過新年也只能二擇其一，我只好把希望你見下我屋企人既願望長埋心中，每次那些八婆二嬸問：唔見你女朋友既？我也只能像特首一樣，給與公式的回答。
如果警察最重要係枝槍，我深信空姐最緊要就係個更表。每次看到你收到那個格仔表的激動，立刻send過來的開心分享，然後24小時不斷埋頭苦幹地swap，以前不明所以，現在它也成為了我的行事暦，余春嬌會因為張志明變得幼稚，那空姐的另一半就會因為咁記得果堆3個一組既英文字母和數字。
每次約朋友、安排活動，也希望放在你工作的日子，希望預留時間在你回港時見面。奈何身為返一至五既奴隸獸，放工已經疲憊不勘，你亦可能因為long haul回來要補眠，閒日約到出黎既時間其實唔多，更甚者是十個周末七個你也「但要走、總要飛」，這種奇異的long D，比大眾想起來更難維繫。
可能有人會話好多工都返shift既姐！有心點會約唔到！但當你一連數天分隔異地，然後她終於回來你卻要OT，到你空閒時她又約了中同十周年聚會，那份無奈，長期下來卻是折騰累人。
再者，成長讓我們也要考慮「將來」。
其實頻繁的旅途己龍經是你辛勤的證據，可惜薪金卻由當初的尚算不俗慢慢變成跑輸大市。
縱然曾經閃過叫你『不如諗下轉工』的念頭，但只要看到你在outport耀眼的傻笑，我就更很肯定雖然每次你也在大叫如何不想返工，但心底裏你還是喜愛這份工作，即使自己做不到或者根本沒有想做的事，也希望你能夠堅持自己所愛，更為著十秒前自私的自己而愧疚。
只是想到要你涼薄的公司大幅加薪或到你升職也許是真普選後的事，身為男人，就更為著自己的無能而無助，掃著你返工旅行的相，每次也在想如果是我倆結伴同遊一定又會是一段難忘回憶，但我卻只能繼續安坐家中與方東昇和兩個可愛妹妹世界零距離。
最後，還是面對各方的好奇和關心，也許是出於好意，或是純粹八掛，大家也對我倆的關係深感興趣。初初一兩年都可以用體驗下甚至玩黎回應，但到三四年，大家也會投放懷疑的眼神。
到了咁上下年紀大家也愛問「佢轉返出去未呀？」「幾時結婚呀？」，一個又一個前路問題好比當年簽署中英聯合聲明前的擔憂，成為沉重的打擊。然而，世界總是著眼在你發出耀眼光芒的地方，卻對陰影視而不見，外人總是難而明瞭你工作的兩難，和我比力威更掙扎的掙扎。
或許如同每次聽著別人的感情煩惱，也會認為只是小事一樁，但正因為感情從來也是如斯細膩，就更會因為細微的動作、少許的感受造成巨大的影響。而當這些影響由一年半載累積到三四五年，加上面對生涯規劃的壓力，真正的考驗現在才開始。
每次有人問我係咪有平機票，話咁咪好正，我都帶著一份茫然，腦海瞬間空洞，只能繼續回答，「都係既」
過左幾年先發覺，原來做空姐另一半，真係唔易…」
問左朋友一句，佢就一野爆左半個鐘，喺沉默良久之後，我終於搵到位問
「咁你有無諗過同佢傾下，或者叫佢唔好做？」
好朋友拿著手中的Corona，仰天長望。
「有」「但我想佢繼續做自己想做既野」
「但你講到好難維繫咁喎..」
「咁我鐘意佢，大哂架麻」
無錯，除左上天安排，夠鐘意，都係大哂既。
