月入$20,000 Marketing上位心得 大公司冗員多最緊要識亂嗡
筆者畢業後有幸入到一間大公司做Marketing，係運氣加少許實力加持底下，好快就升職加人工！做得愈耐你就會愈明白，大公司保守估計有80％嘅人係冗員，佢哋乜都唔識，乜都唔想理其實好易呃，尤其是做我呢啲吹水位，大家只要識看圖講故事，事業包你蒸蒸日上！
亂嗡秘技一：將數字當數據
依家做Marketing乜都要一腳踢，例如接咗個客係想出online feed嘅，就要同designer傾張圖點整，同editor傾段feed點打，之後結果出嚟大家就可以開始看圖講故事了。
如果今次成績唔錯，可以試著說：
今次我哋幫客呢出呢個feed成績唔錯，有1,325個share，最後出到嚟佢哋件衫都因為我哋條feed賣出咗3,122件！成功嘅原因首先係我哋張圖用紅色字夠eye-catching，本身個客件product又唔錯……
如果今次成績比較差，可以試著說：
今次我哋幫客呢出呢個feed成績一般，得215個like，賣出30件左右。失敗原因首先係個客件product本身唔吸引，帶唔起讀者興趣，用紅色字雖然eye-catching但略顯俗氣，令人覺得件產品係cheap貨……
技能剖析：總之將有數字嘅嘢拎晒出嚟結果論即可（適時加入啲懶係勁嘅英文terms效果更佳），最緊要言之成理，好用指數8/10。
亂嗡秘技二：似是疑非
Present最緊要有自信，加埋你個職位加持，基本上都冇乜人會質疑你，畢竟大公司個個都諗住多一事不如少一事，唔好搞到自己就得。所以你只需要講一堆好似好有用，但實際聽完等於無聽嘅嘢就可以呃到人。
所以當你今次個客做衰咗唔緊要，係最後包一包底話自己發現到個原因同解決方法就得，當然個解決方法就係用似是疑非嘅大道理包裝。
「我哋今次發現到依家潮流已經唔興淨色衫，加上我哋張圖有太多字同重點，比唔到key messages人哋，下次應該控制係10隻字以內…」然後再舉幾個之前相似嘅失敗例子即可以令人覺得合情合理。
技能剖析：要呃人先要呃自己，你當自己老作嘅原因係真相即可，好用指數8.5/10。
不過筆者最後都辭咗職，雖然份工薪酬算係咁，但係大公司做得耐個人真係會患上「年輕痴呆症」。我亂嗡廿四，聽嘅人就扤晒頭覺得我講得所言屬是！逼自己扮傻仔返工搵錢真係好辛苦，反正仲後生，都係搵返間可以用腦嘅公司闖一闖！
