同事年尾「清大假」幫你做嘢唔緊要 最緊要有…|職場
廣告
每逢第四季、臨近年尾,各同事都紛紛「清大假」。每年呢幾個月,幾乎每星期都有同事去旅行,公司零食櫃堆滿同事買返嚟但無人鍾意食嘅手信。
同事「清大假」要有交帶
有同事放假,代表需要其他同事捱義氣幫手頂替工作。
但大佬啊!幫你做嘢唔緊要,但可唔可以有少少交帶呢?
我公司有一位同事,佢平時返工工作表現唔錯,好快手亦好少出錯。但係佢一放假,各位同事就開始頭痛!
喺佢放假前一星期,成班同事已經好似輔導員咁走過去問佢:
「有冇嘢幫你啊?」
「如果有嘢你放假需要幫手,記住出聲喎~」
「做唔晒唔緊要,交低畀同事就可以喇。」
每一次問佢,佢都答:「我搞得掂!」
結果一到放假,所有問題就浮現晒出嚟。
經常會有客人打電話嚟問嘢,又或者幫佢執手尾。
同事放假嗰個星期,我每日都好似偵探咁。
一收到電話,就走埋去佢座位搵佢櫃桶、搵佢嘅文件、追尋佢啲E-Mail…
拎起一疊文件,逐份追查返來龍去脈,花費我極多時間。
終於,我忍唔住打長途電話畀佢,因為客人發晒脾氣,又唔肯講清楚發生咩事。
有時遇著呢種只想搵人嚟發洩,捉住你把柄狂鬧,又唔幫手解決問題嘅客戶真係命都短幾年。
喺我瀕臨崩潰嘅時候,放假呢位同事竟然講咗句:「我喺遊樂場啊~你搵返啲mail睇啦!上面有晒電話號碼,我寫得好清楚…」
講完呢句,佢Cut咗我線…
最後,一個好簡單嘅問題,花咗我全日時間去解決。
臨近放工,我先可以返埋位,自己嘅工作都未做過。
一星期後,放大假嘅同事終於返嚟。
我好想走過去鬧爆佢,就算佢買咗日本士多啤梨做手信,都彌補唔返我嘅精神損失!
不過,我始終無咁做…
因為,佢放完假就輪到我,我仲要拜託佢幫我手…