職場陷阱要小心 辦公室戀情 根本係挖個窿畀自己踩 | 有心無默 | 職場制勝

撰文：有心無默 ｜ 圖片：unsplash

千祈唔好搞同事

有次約埋一班老同學食飯，咁耐冇見又難得齊人，理所當然咁會傾到各自嘅感情狀況。

仲好記得，當有人提到自己同公司某位女同事曖昧緊嘅時候，主角A君即刻語重深長咁彈咗句：「千祈唔好搞同事。」

顯然A君係經歷過一場場腥風血雨，先至講得出呢句說話。見狀，我哋當然嘗試追問落去……

話說五年前，由於A君打工儲落唔少積蓄同人脈，見時機成熟，就同佢嘅好兄弟B先生夾份開咗間公司。

頭一年固然辛苦，但慢慢公司都叫做上咗軌道，開始有錢去招聘新同事。

難得做老闆，間公司又主打後生市場。

職場陷阱 辦公室戀情

B先生一心係諗住請啲年輕得嚟樣又唔錯嘅女同事返嚟，睇下有冇機會近水樓台。

最初A君都覺得冇乜嘢，最重要係有工作能力。

而事實大部分同事初初都係好有幹勁……

直至B先生同其中一位女同事C小姐嘅戀情浮上檯面，所有嘢就即刻唔同晒。

影響團隊士氣

C小姐開始變到好懶，工作效率其低之餘仲經常請病假。

雖然有同事發現C小姐居然喺病假日飛咗去台灣旅行（喺社交平台肆無忌憚咁放相），但因為知道佢同B先生嘅關係，所以冇人敢出聲。

只能默默咁頂晒C小姐嘅工作。辛苦係當然，最慘係呢啖氣影響咗成個團體嘅士氣。

當A君知道呢件事之後，佢即刻私下同B先生傾。

隻眼開隻眼閉

原來B先生都聽聞過C小姐有唔少惡行（公事上）。

無奈洗濕咗個頭，C小姐對自己又真係好（感情上），所以先隻眼開隻眼閉。

嗰次傾完，最後結果係一人讓一步。

B先生決定拎筆錢加同事嘅人工，間唔中搞下聯誼活動，完成大Project之後有得放下假……希望藉此安撫班同事。

最初都幾有效，點估到C小姐居然會變本加厲。

決定同B先生拆夥

成日擺出上司款指罵其他同事做得唔好，最後矛頭仲指向A君，兩個人成日喺會議上有衝突。

有次A君仲發現C小姐喺某個熟客面前講佢壞話……最終事態去到一發不可收拾嘅地步。

A君再次走去同B先生攤牌，但今次B先生依然企喺C小姐嗰邊，因為佢哋兩個已經去到談婚論嫁嘅階段。

結果，以完美嘅狀態完成埋最後一份Project之後，A君毅然決定同B先生拆夥。

仁至義盡嘅佢雖然冇拉到班同事走，但事後有唔少人都主動辭職跳槽過去。

冇咗一班真係做得嘢嘅同事同潛在客戶，據聞B先生嘅公司越做越霉，兩年後嘅今日終於執埋。

雖然係咁，但佢同C小姐好似最後都係有拉埋天窗。

辦公室戀情就係矛盾喺呢個地方，兩者真係好難平衡得好，只能怪愛情真係會令人盲目。

「講到唔好搞同事，」聽完A君嘅故事之後，一直認真聽嘅D妹終於忍唔住出聲：「我公司其實都有一單幾犀利嘅。」
下次繼續。

作者簡介：有心無默。網絡作家，以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。