打工仔應否「戴勞」返工？月入2萬網民被同事眼超超 誠哥都只係戴Citizen
撰文：經一編輯部｜圖片：Unsplash、中新社
打工仔：低級職員應否戴勞返工
日前，有位打工仔於香港討論區以「低級職員應否戴勞返工？」為題發文，表示自己十多年前曾以低價購入一隻勞力士，現已升值為10萬，但他卻發現每次戴這隻手錶上班，同事都會以奇怪目光看待他。而該打工仔轉工後，由於月薪不高，因此不敢戴這隻勞力士上班。
「十幾年前，出嚟跑數做sales，上司多次苦口婆心叫我使啲錢裝身，所以當年人工2萬，買隻鋼勞返工，4萬5千元。之後行業不境氣，都要轉行由低做起。去到其他行業，同事都用奇怪眼光睇我隻錶，只因隻錶升值得好快。今年，我返一份新工，人工都係兩萬零（十幾年原地踏步），隻錶已經要10萬，我都唔敢戴返工了。」
網民：周街都勞啦！
樓主帖文一出，引起不少網民熱烈回應。有人認為要依照工種決定，指在「香港地先敬勞仔後敬人」，又有網民表示自己戴錶貴過老闆，皆因有見客需要。不過，部分網民回覆樓主指不應過份憂慮外界的眼光，認為勞力士只是一隻普通的手錶，大部分人都不會在意。
- 「周街都勞啦！」
- 「唔明戴勞有咩問題，普通嘢。」
- 「爛鬼工具錶一隻，唔使咁上心 。」
- 「你以為人哋會懷有奇異眼光，係你一廂情願而已！」
- 「又係錶一隻。」
有人話勞力士好普通 連10大名錶都唔入？
有網民續指，外界不應將勞力士吹捧成身分象徵，因為普遍戴勞力士的人只會「當普通錶咁戴」，更有人表示若上司認為下屬戴勞力士過份浮誇，只是他的層次未夠。
- 「只係英文字串成的品牌名字！只係1隻電子或自動或上錬的手錶！店主眼中係商品；玩家眼中係玩具；用家眼中係手錶。」
- 「勞力士只係呃到班唔係好認識錶的人，一見到勞力士就覺得勁。如果你上司覺得你浮誇，只係佢層次未夠而已。」
- 「其實勞同精工錶無分別，唔知啲人點解咁奇異眼光望住！戴嘅人當普通錶咁戴！」
- 「勞力士，個名都話咗畀你知，勞工階層先會買，人哋覺得你無大志。」
- 「勞力士錶以前係啲粗人戴嘅，後來撈得起嘅人戴多，貪佢諧音有得撈襟撈，連十大名錶都唔入，有錢人唔戴㗎。」
戴錶同工種無關 好多人都戴勞？
更有網民認為戴錶是個人風格的體現，與財富、收入沒有太大關係，例如收入低不等於用不起奢侈品，收入高亦不一定全用名牌，指樓主根本不應該過份擔心。
「戴錶應該係個人風格的表現，同工種、財富有部分、但不應有太大關係。」
- 「大把𡃁仔揾萬零蚊都幾千蚊件衫、幾千蚊對鞋、幾萬蚊個袋啦！」
- 「樓主有否見寫字樓女職員拿著的幾萬元名牌手袋。分分鐘貴過閣下手戴着的勞力士錶。」
- 「上個禮拜我叫阿叔上嚟裝修，佢都戴隻勞，唔係咩新鮮事，又唔係開林寶返工。」
- 「我𡃁妹時已戴勞返工， 做份秘書仔一萬鬆啲人工咋 。我阿哥結婚時， 屋企人買勞畀佢兩公婆， 老豆錫我買埋畀我，我係金鐘返工，日日著套裝戴勞上班，都唔算啲咩。」
- 「你鐘意戴就戴，同人工高低有何關係，唔明…」
勉強戴勞 只會被看不起
雖然不少網民勸樓主可以戴勞力士上班，但有人卻指配戴與個人身分、收入不匹配的手錶，最終只會被人看不起，分分鐘會被人嘲笑。
- 「戴出嚟人哋都當你用 A 貨，就算真貨人哋都只會覺得你節衣縮食死慳死抵買返嚟，暗暗笑緊你。」
- 「身大過家，明眼人會睇唔起。」
- 「低調啲，財不可露眼。」
- 「學大劉話齋，我戴隻假嘢出嚟都唔會有人覺得係假嘢！」
富豪一定用名錶？
部分網民指，不少香港人鍾情玩錶，甚至有人留言指「大部份香港人隻錶貴過香港首富」。雖然有人認為手錶是身分與品味的象徵，但事實上不少城中名人、富豪所用的手錶並非名貴，對他們而言實用性較為重要。
長江集團創辦人李嘉誠戴Citizen手錶 價值港幣2,700元
以長江集團創辦人李嘉誠為例，多年前他曾接受《彭博》訪問，當時記者發現李嘉誠所配戴的手錶為日本品牌Citizen的光動能手錶（AW1165-51E）。
據官方網頁顯示，該手錶定價為港幣2,700元。當時記者問李嘉誠，使用這隻手錶身邊的朋友會否以異樣的眼光看待他，李嘉誠表示，所配戴的手錶若價值10萬，要用得小心，但如果只是數百美元。他可以打高爾夫球、游泳、做任何運動也可以戴，則不需要小心翼翼。
世界第二首富比爾蓋茨用CASIO電子錶 10美元即入手
除了李嘉誠，世界第二首富比爾蓋茨（Bill Gates）亦鍾情平價錶。據《華盛頓時報》多年前的報導，他手上所配戴的手錶為日本品牌CASIO的電子手錶「W214H-1AV」型號，在Amazon上的售價約10美元，約港幣78元。另外，比爾蓋茨過往出席公開活動時，曾配戴CASIO的潛水錶，Casio Quartz Diver 200m WR，價值約50美元，折合約港幣390元。
