打工仔職場上位 學識高層5個上位思維方式
廣告
打工仔職場上位？學識高層5個上位思維方式！你有冇諗過做老闆？你有冇諗過你點解做唔到老闆？因為你唔識企喺老闆角度諗嘢呀！為咗令到人人可以做老闆，小編就以下幾個角度分析吓老闆同你係點諗嘢。
撰文：Smart ED編輯部 ｜ 圖片來源：網絡圖片
早到是常識 V.S. 準時就準時
老闆眼中的準時返工：
早到10至15分鐘是常識吧。唔早到又點樣準備好自己投入份工作、奉獻畀公司。早到係尊重自己，最重要係，你哋班打工仔係應該迎接佢返工，而唔係佢到咗你都未到。
你眼中的準時返工：
入職要求返幾點就幾點喇，條件寫出嚟係要守，我都係尊重合約精神。嗱，雖然平時我有機會遲少少，你知返工時間幾多人，我都唔想。而且，一到9點個腦就會準時開動，係你睇唔到，唔關我事。
隨時候命 V.S. 收工就自由
老闆眼中的工作時間：
你嘅時間係佢嘅，佢嘅時間都係佢嘅。收工只係佢批准你身軀離開，你嘅靈魂要一直存在喺WhatsApp同電郵入面，on call 36小時，全年冇休。咩呀，請病假就唔洗做呀？收得人錢就預咗賣埋條命喇。
你眼中的工作時間：
入職時寫朝9晚6就朝9晚6喇，每日準時返工就係為咗準時收工。不過咁，辦公室生存之道就係扮工，所以點都會扮勤力扮多嘢做，實行坐多10分鐘左右先正式起錨。
永遠地做嘢 V.S. 長命功夫長命做
老闆眼中的工作勤力：
永遠都有嘢做，而且對工作有熱誠，主動問佢有咩要做。對公司無私奉獻，將個身同個心都交晒出嚟，永遠唔會放工，就好似嫁畀公司一樣。
你眼中的工作勤力：
喺辦公時間做足本份就夠晒數喇，做唔晒就留返第日喇！正所謂：長命功夫長命做。加班？食得架？
正常加班就係……….
老闆眼中的正常工作量：
唔會多嘢做囉，佢只不過係畀返同人工相對嘅工作量你，除返開每份Job都有返$300至$500。冇多冇少，絕對公平，加班都做唔晒只係你懶。
你眼中的正常工作量：
半日就應該做晒所有工作，夠鐘準時收工。
萬能俠 V.S. 我係零
老闆眼中的你：
你應該咩都識，上至佢想你識嘅技能，下至你見工時話識嘅技能，總之所有你都要識。係佢眼中你係萬能俠，唔係萬幾元請你返嚟做咩呀？
你眼中的自己：
吓，我諗住做好份工準時放工就算，你唔好搞我喇。
