成世人流流長 總會遇上幾個惡頂上司
撰文：藍橘子
更加悲哀嘅係，一世人唔會轉好多次工，但總有機會遇著心理變態嘅上司。
有身邊發生嘅真實個案，有個朋友返工因為要長期應付個變態上司，搞到自己有抑鬱症。
好多身邊嘅人都勸佢辭職，但抑鬱症令佢無晒自信，充滿思想負面，所以唔敢辭職，怕自己唔適應唔到新環境。
旁觀者都認為，無論新環境係點，都會好過對住個變態上司。但唔知大家有冇留意，通常有同類型個案，受害人總係唔會辭職。
正如每間公司都有個人幾乎每星期都講一次「我就嚟辭職唔做」，結果做得最耐就係佢。
點解會咁？佢哋唔係因為有被虐待傾向，而係好驚轉咗工作情況都係無改善，咁嘅話就必須承認係自己失敗，能力不足，與上司或工作環境無關。
雖然現時呢份工上司好衰，但工作尚算應付到，總好過承認失敗，所以遲遲唔肯轉工。
總括晒身邊朋友親身經歷，可以分類出以下幾種變態上司嘅類型。
１）神又係佢，鬼又係佢
呢種上司最經常講嘅說話就係：「你以為？你幾時覺得自己可以自把自為做決定啊？！」無論你做乜決定都係錯，一定要跟足佢嗰套。但當你閂晒所有個人思想，成個機械人咁跟足佢做，又會受到批評：「你完全無主見？不如我幫你做埋啦！」
２）自虐狂
當你以為只要咬緊牙關，捱到自己升職上位就唔使再受虐待。但偏偏有種上司就有自虐傾向，逼自己死做爛做，最慘係佢未收工，好多下屬都唔敢早走。自虐上司一直留戀住自己以前嘅痛苦，同時間，佢一定要班下屬受返呢種痛苦。
３）用最蠢方法解決問題
有一種上司，當發現工作上有問題出現，為咗確保唔會再發生，上司就會用最愚蠢嘅方法去解決問題。例如出席event漏帶咗某件產品，上司首先會要求你做一張list，去記低每樣需要帶嘅嘢。如果日後張list整漏嘢，就要再整多張list，去管理張list應該有啲乜…再錯就再整多張list去管理張list去管理張list…
結果，工作愈來愈多，出錯機會亦相對提出，惡性循環…
好多上司可能做嘢好叻，學歷好高，但忘記咗聆聽下屬意見同難處，作為上司其實只需要負責決策下屬嘅提議，而唔係命令下屬跟住自己一套方式去做事。
