後生仔唔驚人工$12,000 最驚係份工無嘢做
廣告
文：Purple弟弟
筆者由畢業到依家，二年間都轉咗五、六份工作，而當中有忙到你日日要OT嘅，都有hea到每日做兩三個鐘就做完一日嘢嘅，但我可以好肯定咁同你講，忙唔辛苦，冇嘢做先係最辛苦，以下係小弟嘅親身經歷！
求知慾爆棚嘅職場新人
相信每個人初踏入職場，對公司每一個部門同整體運作都好感興趣，終於可以開始人生令一階段，大展拳腳！以做傳媒為例，你會想學點做好一個採訪，點寫到一篇引人入勝嘅好文；又會想學點樣影封面靚相、點樣由零開始拍好一條短片，條片點剪先好睇，你全部都想知，後生仔係職場上就係比人多一份對工作嘅熱情，乜都想親手學親手做！
而為咗滿足你自己嘅求知慾，自然會嘗試要求學更多，做更多，雖然會令自己工作量增加甚至OT，呢一種OT相信係最值得嘅，因為你唔係為做而做，你係學緊對自己份工有幫助嘅技能！
失去本能，點唔辛苦？
後生仔出自本能哋會憧憬未來、即使冇諗到要出人頭地，但最少都想做一個有貢獻、有價值嘅人。但你做一份hea工就好似係水族館嘅大白鯊咁，應該係大海探索嘅你，只可以係窄小空間無所事事，每日重重複複係同一地方、同一景觀，你會唔會想死？
當然會！所以其實現時根本無水族館可以睇到大白鯊，佢哋會不斷嘗試走出呢個人類為佢提供嘅「舒適圈」，直至撞到重傷，甚至絕食嚟了結自己生命。不過我哋從小就被教育要珍惜自己條賤命，所以惟一可以做嘅轉係轉工囉！
