返工填表寫Report 完全係為寫而寫 上司直接嚟睇我做嘢仲實際｜職場制勝

撰文：Purple弟弟 ｜ 圖片：電視截圖、unsplash

低層返工都要寫Report

以前講起Proposal、Report呢啲字，就覺得都應該有返咁上下職級先會做呢啲！

但依家連呢啲嘢都已經去到唔少低層打工仔返工都做緊，而佢哋嘅「Report」可能係每日自己做咗啲咩，又或者每星期檢討上星期有咩做得好，有咩要改善。

聽落好似好小事，難就難在你一個成年人，但返工就成個小學生咁，日日係到看「表」作故事，始終都會有些少反感。

複雜到唔知點寫

以我自己為例，返工就知，依家有唔少「Report」，其實公司都有固定格式，我都係跟返佢個表填內容落去！

但我真係好想知邊個部門整呢份表出嚟，成日作埋啲懶系專業，即係望落全部都係你識嘅中文字，拚埋你就完全唔明嗰種！

「活動預算」，明白明白，呢個識填！

「舉辦活動原因」，唔通寫公司一定要搞咩，不過都明佢講咩，可以作個答案，但之後就開始嚟料啦。

「如何形象化公司理念」無諗過喎，你哋批准我搞夠唔夠形象化？

「預計支出：人工、場務、拍攝……（下略超過20項）」

你開咁多欄比我做乜，我只係想個活動請2個helper，使唔使填咁大份嘢？

無用先最慘

填一堆表，一堆「Report」都算，最慘係根本無用途，完全係為寫而寫！

只要你跑到數做得好，邊鬼個理你啲「Report」。

相反，有時你想要人工、設備，要寫「Report」等公司批都合理！

但使唔使整到個表或者Report咁鬼複雜，老實講，你咪唔好買、唔好請人，反正返工做唔曬啲嘢都係公司損失，可唔可以簡單少少？

有時填填下，心諗又要我總結自己今個星期做咗啲咩！我真係唔明，上司你日日同我共事，不如你得閒，自己行埋嚟睇下我返工做緊咩。

總好過睇我每星期作嘅Report，反正期期內容大致上都係講自己十項全能、忙到甩轆！

十項全能可能吹大咗，不過忙到甩轆係真嘅，要成日處理非主要工作嘅繁瑣事，例如填表！