失業一個月 母親要求畀多6,000蚊家用過年 港男呻超出能力範圍 網民：畀係人情，唔畀係道理
撰文：經一編輯部 ｜ 圖片：Unsplash
有位打工仔於香港討論區以「無工返，老母仲要問我拎6,000蚊過年」為題發文，指自己上月被解僱，幸好有儲蓄，尚能應付日常支出以及家用。不過，近日他卻收到母親的WhatsApp，要求他額外多付6,000元家用過年，但該打工仔卻認為今年新年將受疫情影響「唔會大搞」，指母親的要求不合理，更質疑母親的做法是「為面？定係為錢？」。
我已經解釋過其實無工返，今年新年其實都唔會有乜氣氛，返唔到大陸，大陸都唔會有親戚落到嚟，更加無乜人會上嚟拜年，其實真係唔需要大搞，不如從簡普普通通咁搞……但係佢死都唔肯，咁我搵阿爸傾，其實佢都唔想大搞，但係老母話一定要照搞……其實今年都唔會有新年啦，都唔明大搞做乜，為面？定係為錢？
樓主後來回覆網民表示，母親的要求實在超出自己的能力範圍之外。
「我根本畀唔到，畀完佢，下個月又要畀家用，我都要食飯㗎。」
網民斥樓主：6,000蚊都同阿媽計！
樓主帖文一出，引起網民兩極回應。有人認為樓主既然有積蓄，而6,000元屬小數目，不應與母親計較，更不應為錢與反面，當「一次半次當氹下老人家開心」。
- 「一年都係一次啫，最多咪自己再慳啲囉。」
- 「你阿媽一年問你拎幾多次，一次半次就氹下老人家開心啦！」
- 「佢出到聲就畀佢啦，自己阿媽冇計， 快啲搵工實際！」
- 「就算老母唔問你自己都自動自覺要畀啦！」
- 「其實6,000蚊真好少。雖然無嘢做，但有儲蓄，畀6000氹下老人家都無乜所謂。除非真係無錢。」
- 「6,000蚊真係唔係多，又唔係60,000。」
「你咁大個人無積蓄？ 6,000蚊都同阿媽計，你計下阿媽養你咁多年，嗰度幾錢。唔鬧你都唔得㗎！」
「六千，可以畀就畀。為六千反面，唔值。暫時無工返，唔係一直冇工返。你做好仔咁多年，因為一次六千，之後要做衰仔。就算下年畀六萬都補唔返。」
「如果父母都無收入，做仔女的就盡能力畀吧，自己用少點食差點都沒所謂，如果能力上的確做唔到就講明畀父母聽，父母都應該會諒解的」
阿媽做法不近人情？
雖然部分網民認為樓主過分計較，但亦有人指其母親明知兒子失業，卻沒有體諒對方，要求不近人情。
- 「你阿媽呢啲咪係叫不近人情，做人唔睇環境囉。」
- 「6,000蚊呢個時期真係好多好有用，換轉係我唔會畀」
- 「不過你阿媽又係嘅，明知咁窮㗎啦，仲搞乜嘢？」
- 「不過你媽咪未必係充大頭鬼嘅，好多人鍾意過節，佢哋覺得有節日感可以為平凡嘅日子帶嚟色彩，不過我諗有呢種諗法嘅人通常好得閒。」
- 「唔會畀，失業要留多個錢係身邊，要畀最多畀1,000蚊至2,000蚊。」
畀多啲係人情 唔畀係道理？
不過，有網民卻指家家有本難念的經，建議樓主應再向家人解釋現況，畀家用應量力而為，有人直言「畀係人情，唔畀係道理」。
「每個家庭背景都唔同，家家有本難念的經。盡咗孝心就好，太愚孝有時都唔一定係好事，真心問過得自己過得人。」
- 「畀係人情，唔畀喺道理。但同屋企人講道理係最蠢。如果決定唔畀，試下講感情。同阿媽講，無錢揾工，叫佢借萬四，加上六千，齊頭欠佢兩萬，有工返每月四千，還半年。佢又有息，你又有錢。」
- 「一係同佢講錢就係得咁多，𠵱家畀咗之後幾個月家用度扣返，叫佢自己決定」
- 「如果往年都係咁畀開，唔好理佢點搞。依家仲畀得起咪畀囉！如果你嘅錢唔夠3個月使費（預1個月內搵到工，返1個月先有糧出，1個月應急）。到時無綜援都要食屋企嘅…… 咪認真咁同佢解釋下。」
