向幼稚園老師致敬 為學生幾辛苦都捱下去｜職場制勝
由小朋友入校門嗰刻，到佢哋放學，佢哋嘅一舉一動都關我事。
有啲人成日都以為做幼稚園老師淨係教ABC，係ABC之外仲要帶住小朋友唱下歌、跳下舞、食茶點、去廁所。
但係小朋友嘅活力就係一下都唔可以停低，同一時間成個班房可以有好多事發生：
瀨尿、打交、跑來跑去、咬人、跌親，要逐樣逐樣處理，真係少啲心血都唔得。
有時上堂都要玩啲大型玩具、波波等，最怕就係小朋友唔小心整親，因為一整親，啲家長就會不停問長問短、又話要投訴之類。
我唔係無睇實，小朋友整親我都好心痛，但一班30幾人，一個老師要睇曬咁多個，都會有難處。
好在有時都會遇到好體諒我哋嘅家長，講句叫個小朋友下次記住小心啲就安心畀佢繼續玩。
都係嗰句，一班30幾人，佢哋一人一句其實好大聲，要佢咃聽到我講野，就要同佢哋鬥大聲。
但佢哋就算聽到都唔一定會跟住指示做，所以喺適當嘅時候都要對啲小朋友惡啲，唔可以畀佢哋蝦返轉頭。
日日放工聲都沙埋、嗌破喉嚨，返屋企飲杯蜜糖水，明天又係一條好漢。
其他人返Office都有1個鐘食飯時間，做幼稚園老師有10分鐘食飯時間已經好好，食2啖又要去望下啲小朋友，拿拿淋食完仲有好多野要做。
做幼稚園老師好似坐監咁，返咗工就無得撳電話，每次放工望到電話有幾十個missed call幾百個訊息，好似與世隔絕咗一個世紀咁，真係好無奈。
有啲學校好啲，畀老師喺食飯個陣撳下，未至於全日都無得用，不過都只可以快睇快覆。
食完飯仲要氹佢哋瞓覺，有啲小朋友好快瞓著，我梗係想佢哋快啲瞓著，我就有多啲時間做野，不過都明白總有啲比較難瞓著。
做老師嘅都要出盡法寶盡力氹到佢哋每個都瞓到晏覺，就算真係瞓唔著，都望佢哋乖乖地瞓低唔好騷擾其他同學仔。
諗秋季旅行又係一個「煩」字，小朋友有得圍埋一齊玩，去邊佢哋有咩所謂，但係啲家長就多多意見喇！
揀近啲嘅地方又話去過、無新意！
揀遠啲嘅地方要收返車錢食物錢又話貴、邊洗咁多錢，真係好難服侍。
其實揀完地方我哋仲要去考察架，無咁多時間為咗個目的地揀來揀去。
到最後仲有一場硬仗，就係畢業典禮。
畢業禮當日用「打仗」嚟形容完全無講錯，坐喺出面欣賞表演嘅家長係唔會知道後台有幾亂。
一大堆化妝品攤晒出嚟，幾十件一模一樣嘅珠片衫，要用摩打手幫每個小朋友化妝、著好表演嘅衫，仲要確保無人走失！
成個癲婆咁叫佢哋排好一條線。不過最後見到佢哋開開心心表演完，正正係嗰種滿足感驅使我繼續努力做好幼稚園老師呢份工。
