公司無飲水機 晚上七點後熄冷氣 老闆當員工「支出」非「資源」
人生中見過最孤寒嘅老闆
曾經遇過一間「神奇公司」，呢間公司嘅老闆係我一生人之中見過最孤寒嘅人。
公司基本上每日加班係正常嘅，但其他同事又甘願每晚加班到十點先神奇。
大陸加班都有雙倍薪金啦，我間公司畀得最低工資，老闆話因為加班即係未能完成工作，所以唔應該有雙倍薪金。
最慘係每個同事嘅工作量，根本無可能喺返工時間內完成。
同事有約會會提早返公司做嘢
可能你會問，乜其他同事無生活㗎咩？！
你又吹佢唔漲，如果佢哋有約會，會提早幾個鐘頭返公司做嘢。
而更加吹漲嘅係，無論你放工定放假、去旅行…都要照樣收公司e-mail。
所有客戶都有你手機，隨時會打畀你，同你講句：「唔好意思～知道你放緊假，但有樣嘢想你幫幫手。」
老闆採用自然流失政策
可能喺生意人眼中，「忙」係好事，代表公司有錢賺。
但正常嘅公司規模會愈做愈大，「神奇公司」就愈做愈縮…
我係指員工方面，如果有同事辭職或放產假，老闆係唔會請過新人返嚟，直至公司出現嚴重人手不足導致出現嚴重錯誤為止。
而離職嘅同事，恭喜晒～因為公司唔會有任何花紅同雙糧，之前請嘅大假仲扣錢添。
公司係無IT部門
曾經有同事因為不忿雙糧被扣，臨走嗰日將所有舊e-mail清除晒，仲有公司舊有嘅excel format都全部刪除晒。
順帶一提，我的公司係無IT部門，電腦有事都係打電話畀外判公司求救。
我曾經問過一間公司廿幾人，又有自家System，點解無IT部門？！
根本老闆所講，公司電腦正常嚟講唔會經常壞，所以公司唔需要一個部分每日返工，等啲電腦壞。
員工嘅拼搏程度
另外，公司只得水煲無飲水機，想飲水自己去廁所裝水煲熱再飲，夜晚七點後要熄冷氣，有一半以上同事仲用緊舊嘅厚版螢幕…
其實，員工嘅拼搏程度，好睇老闆到底將員工當係「支出」定「資源」。
不過咁，呢間「神奇公司」入面嘅同事，似乎好樂意將自己當係支出，係老闆嘅負擔，每日返工就係對老闆嘅贖罪。
請到呢班員工，真係老闆嘅一生福氣。（利申：已離職）
編按：藍橘子為80後網絡作家，憑【我是技安，我出席了大雄的葬禮】網絡創作爆紅。
