全港24個行業 加人工 趨勢 你有冇被underpaid
當中以「資訊科技」 ( IT ) 及「地產及物業管理」薪酬增幅最高 , 加幅高達 5.3% ；其次是「會計」 ( 5.1% ) 及「樓宇及建築」 ( 4.4% ) 。至於加人工最少嘅行業 , 分別係「銷售、客戶服務及業務拓展」和「款客服務 / 飲食」 , 今年薪酬增幅分別僅 2.8% 及 2.4% , 都較平均加幅 3.9% 為低。
jobsDB 日前訪問 1,869 位來自 24 個行業的受訪者 , 當中 85% 是在職人士。有 61% 受訪者表示今年獲得加薪 , 另有 37% 及和 2% 受訪者表示薪酬沒有改變和被減薪。
報告同時列舉出多個行業及工種最新薪酬情況 , 大家不妨對號入座 , 睇睇自己份糧跟唔跟到市場走勢。
至於花紅及雙糧 , 53% 打工仔表示有花紅分 , 各行業平均派 1.5 個月薪金作為花紅 , 當中最疏爽嘅係「銀行及金融」 , 平均派 2.3 個月花紅。
另外 , 有 44% 打工仔表示獲出雙糧 , 但同時獲派花紅及雙糧的打工仔 , 只有 21% 。
好多打工仔無乜要求 , 都係希望份人工高啲 , 做嘢都開心啲落力啲忠心啲。調查發現 , 有 43% 打工仔表示計劃轉工 , 較去年 39% 為多。 打算轉工的受訪者當中 , 更有 19% 已剛在去年轉工 , 跳槽情況頻密。
「不滿意薪酬及福利」是打工仔轉工最大理由 , 而轉工又的而且確令打工仔人工有 5.3% 加幅 , 真係魚唔過塘唔肥。
又不過 , 想 加人工 又唔一定要轉工。最近 , 我哋就集合多方意見 , 歸納出 7 個說服老闆肯加你人工的方法 , 睇吓幫唔幫到你 ?
加人工 7 大方法
( 1 ) 俾說話你老細聽
有時講開買乜乜嘅時候，可以輕輕帶句啲嘢好貴呀、生活艱難咁，俾啲 hints 你波士知道你想 加人工 。不過呢，呢招只適用於啲唔縮骨嘅波士，而大部份波士其實都好縮骨，九成九即刻側側膊扮聽唔到就算。
( 2 ) 直接同波士講你想 加人工
其實你都心知肚明你波士係個咩人，第一招響佢身上嘅成效有幾大。所以與其旁敲側擊，不如你直接出擊。 加人工 嘅嘢，其實只要你夠薑就可以提出。
不過需要注意嘅係，你夠薑都好你都要有啲自知之明，如果你一向返工又唔係準時、做嘢唔係 100% 有交帶、成績又唔係特別好，咁就閉門磨練一段日子先啦……
( 3 ) 整個 portfolio 俾自己
將平時自己做得好、波士讚你嘅嘢儲起佢整理好，到時到候就拎出嚟同老細傾，作為你要求嘅有力理據。呢招唔單止嗌 加人工 啱洗，甚至要求升職、或者搵下份工都非常啱用，可以深深 impress 對方，留下好印象。
( 4 ) 用數據證明你 underpaid
到底出邊公司出緊咩條件俾同你同一個職位嘅打工仔呢 ? 不妨做多啲功課，上吓各大求職網了解一吓行內嘅趨勢，摘錄低啲數據資料，整理一下再展示畀你波士睇，以數字證明你係 underpaid ，須要 加人工 ，否則遠走高飛。
( 5 ) 唔好咁易耳仔軟
老細緊係想節省成本，如果唔係你都唔洗自己開口啦。老細永遠有一萬個理由唔 加人工 俾你：市道差、生意差、上面唔開心、佢唔開心…… 總之點都係想耍走你，佢差嚟差去嘅時候你要強調自己 加人工 嘅理據。怯，你就輸了。
( 6 ) 問老細 加人工 要求係咩
不過，有啲老細就好好耐性，同你耍足個幾鐘太極都唔肯加。呢個時候你再糾纏落去都無用，不如開宗明義問佢到底要達到咩條件先會加畀你。不過記得企硬問清問楚，唔好畀老細又蒙混過去，否則下次都只會又有其他原因耍走你。
而如果你老細同你提出一啲無理要求嘅話，你要諗清楚係咪時候轉工喇。
( 7 ) 加唔到人工都要老細應承你一啲要求
放假又好、加津貼都好，總之加唔到人工都要拎返啲嘢走 !! 如果你可以無條件投降嘅話，俾老細覺得你易恰，繼續要你無條件應承佢一啲苛刻嘅要求。
為自己爭取返啲 bargaining power ，唔好輕易屈服，你要記住你係嚟 make a deal ，唔係嚟 plead 佢嘅 !!
打工仔除咗最 加人工 ，仲想準時放工，但呢個往往是妄想。
調查發現，絕大部分 ( 89% ) 受訪者都有在辦公室超時工作，當中大多數 ( 75% ) 更未獲任何補償。共有 39% 受訪者每週會在辦公室加班 4 小時以上， 23% 加班 7 小時以上，甚至有 3% 加班 16 小時或更多。
除此之外，有 61% 的受訪者會在私人時間工作。僱員在私人時間最常進行的職務為通訊，有 41% 的人表示自己總是或經常收發短信，有 35% 則會收發電郵。
他們在私人時間工作的原因各有不同，有些是為了「工作需趕在限期前完成」 ( 54% ) ，或「以免得失老闆 / 同事 / 客人 ( 48% ) ，有近半數受訪者 ( 46% ) 更指這是「工種需要」。
