用中文覆Email被上司鬧無教養 網民：喺香港返工好奇怪 一定要用英文
撰文：經一編輯部｜圖片：香港討論區、Unsplash、中新社
樓主：用中文覆email反而畀上司鬧
日前，有網民於香港討論區以「用中文 SEND EMAIL 比上司鬧…… 」為題發文，稱自己因為身體不適，不想麻煩，因而選擇用中文回覆電郵。
結果，上司發現後卻召見他，稱公司又不成文的規矩，一定要用英文回覆電郵，對內對外亦不能用中文，否則會令其他部門感覺沒有教養。該網民坦言，整間公司都沒有外國人，不明為何一定要用英文回覆電郵。
喺香港基本要用英文出email？
帖文一出，引起網民兩極回應。有人認為，既然公司的慣常做法是用英文回覆電郵，樓主沒有理由不遵守，更有人指他明知故犯。
「喺香港做嘢真係基本都要用英文出email，我收到中文email我會以為佢唔識英文，就算對內對外都一定係用英文send，就算對面用中文send來都係用英文覆。出來做嘢就要跟返個文化，唔係嘅do or quit。」
- 「其實一般都以對方電郵語言回覆， 這也是基本， 只不過封電郵有高層又有內部同事，上司會覺得無face，但未至於無文化無教養。」
- 「簡單問一句，對方用英文出email畀你，你回中文？唔覺得有問題？」
- 「正常禮貌，人哋中文來你要中文往。英文來就英文往」
- 「你公司用開英文email ，為何會回中文？有人回法文給你，你覺得如何？」
- 「呢啲規矩你一早都知，明知故犯。你覺得唔適合公司文化咪走，唔好失禮你部門。」
- 「人哋覺得呢個同事好怪，無啦啦用中文覆。你以為玩WhatsApp、WeChat，你想寫咩就咩？」
- 「其實，你有無諗過點解先？如果間公司嘅文化係咁做，反而其他人係諗，點解你咁大支嘢，公司文化都可以唔跟嘅呢？唔好先係自己嘅諗法行先，睇清楚咩原因先啦。你上司咁激動，就一定有其他嘢嘅。」
中英夾雜無問題？
有網民卻認為，用中文回覆電郵並無不妥，認為即使樓主沒有遵守公司規定，亦不應責罵他毫無教養。
- 「我試過公司出中文email，真係唔知有咩問題，寫英文，封email可能就高級咗。」
- 「用中文啫唔使咁呀，咁咪下次無用囉。某程度自己人都睇死自己人，想進步都難。」
- 「我公司有時中英夾雜，都無問題。」
- 「喺中國地方，中文通用，如果大家都係中國人，你用全英文覆Email，我覺得傻傻地。」
- 「我哋學習英文，用英文都無問題。我哋吸納不同嘅文化，可以豐富我哋知識、眼界，但唔可以被其他文化嘅侵蝕我哋嘅文化。」
網民：香港好奇怪 點都要用英文
不過，有部分網民認為這類不成文的規定十分奇怪，甚至有人指部分香港人的英文能力不算好，用中文回覆電郵或許更恰當。
「其實香港的獨有文化真係好奇怪，在學校的教科書要用英文，但老師授課都係用中文。除非教育局走嚟聽堂，啲學生才做畀佢地睇用英文學習；估唔到返工都係要用英文答email，MEMO都要用英文，但我地同事同同事之間交流就用廣東話。求職見工就要寫英文信，但見工都係用中文口頭答，筆試用英文。」
- 「喺自己地方用外來語言溝通，好奇怪，只有香港係咁！」
- 「香港係好奇怪，點都要用英文，不過習慣又無問題」
- 「用英文係無咩問題，問題係香港人啲英文真係好差。」
- 「其實香港好多人英文都好差，我寧願佢哋打中文好過…」
睇得明就得？
有人直言，語言的作用是助人溝通與交流，只要寫出來而對方又明白，用中文或英文亦無不妥。部分網民甚至認為，真正沒有教養的人是他的上司，建議樓主以後應依照該上司所認為有教養的方式，用英文溝通。
「語言同文字都只係for溝通，我寫到，你睇得明，就算外星文我都覺得無問題，都係傳遞訊息，扮乜高檔，講英文我又唔覺特別好聽/高人一檔。」
- 「你上司呢番說話就真係無教養，佢自己都講緊中文啦，又係咪無教養呀？」
- 「叫佢用英文講返呢段說話一次。」
- 「其實睇得明咪得，又唔係啲好重要商業email。」
- 「你上司叫你入房，你叫佢用英文先好鬧你。關咩文化事，多餘，出英文電郵較慳時間，這反而是真原因。」
- 「如果你上司用純正英文鬧你，咁你就認衰算啦！如果佢係用中文鬧你，就應該問返佢，點解你鬧人又用中文？」
網民：用中文或英文 應視乎公司文化
不過有網民認為，無論是用中文或是英文回覆電郵，應視乎實際需要以及公司文化，有人更舉例指到內地或台灣工作，反而不會用英文覆電郵。
- 「去內地公司相反，一定要中文！」
- 「我只知道大陸同臺灣不明文規定，公司內部電郵必須要中文」
「主要睇公司文化，有可能佢哋要forward個message畀其他人，上司，HR，可能佢地唔識中文。不過如果你唔舒服，佢應該體諒下叫你寫番個英文版就算，唔需要叫你入房又大肆詢問一番嘅。」
「其實要視乎你的電郵內容是否工整，用英文交流的原因是寫信往來在對外的文書會否出現「亂碼」。另外一些關鍵字用英文一次過找出來，如果又中又英就比較麻煩，尤其係一啲帳目及銀行相關文件，英文比較方便。」
