員工遞辭職信後表現反映公司好壞 有種老闆即變臉變唔識你｜藍橘子 | 辭職 | 職場技巧 | 經一專欄
廣告
交出辭職信 即變透明人
如果你喺公司係一名「Hea霸」，呢個月將會係你工作生涯最放鬆嘅日子。
你可以毫不留情將所有嘢交畀其他同事，每日返工只需要處理呢個月限期內嘅工作，當公司出現突發狀況，都與你無關。
「我唔理你！通頂又好，拎返屋企做又好，走之前一定要完成晒所有手尾！」曾經有一個上司以威脅語氣同一個遞咗辭職信嘅同事講。
相關文章：辭職旺季必睇 10分鐘速成 教你點寫辭職信
唔單止咁，公司仲Cut走晒呢位同事嘅花紅。
結果，嗰位同事每日準時收工，放慢晒手腳，結果走嗰時仲剩低大堆工作未完成，難為了其他要執手尾嘅同事…
一個員工離職前有幾盡力，就睇間公司對員工好唔好。
相反，有啲同事為公司盡心盡力，想為公司拚博到最後一刻。
辭職希望好嚟好去
以我一位朋友阿臣做例子，佢公司係一個專用做Event嘅公司，每個Project 需要幾個月先完成，阿臣由籌備計劃直至實行，全部都親力親為。
但阿臣因為某原因辭職，佢已經特登計算好離職日期係Project完成後，希望可以完成埋手尾，睇到自己成果先離開。
點知老闆一收到離職信，立即將阿臣嘅工作交晒畀另一位同事，就連活動當日，阿臣都唔可以出席場地。
呢一個月，阿臣每日淨係留喺公司處理E-mail同聽電話…
結果，阿臣不忿寧願補錢畀公司提早離職。
相關文章：辭職轉工 只是從一個苦海跳去另一個苦海
不論係咩公司，員工都係公司最珍貴，最應該善待嘅資源。
當員工好似避孕套咁用完即棄，只會打擊員工士氣，覺得自己嘅努力終有一日會白費。
「好嚟好去」呢個說話係雙方面嘅，除咗員工離職前要有交帶，作為老闆亦一樣善待辭職嘅員工。
