放棄5萬月薪開店追夢遭朋友嘲笑 網民：夢想就算曇花一現都好

日前，有網民在FB專頁「奴工處」投稿，指自己朋友本身打工月薪5萬元，但卻說要追夢辭職開小店，扣除成本之後每個月只賺萬多元，「真心想問咁樣所謂追夢值得咩？」

網民：其實唔關你事

樓主一句「所謂追夢」盡顯嘲笑意味，幸而網民罕見一面倒力撐樓主的朋友，指值不值得只有當事人有資格定義，叫樓主不要用自己的尺去度人：

• 「做人處事首要條件：唔好用自己嘅尺去量度其他人嘅決定。」
• 「學下欣賞別人，我就覺得值得。」
• 「值唔值得只有佢自己先可以評論。」
• 「每個人有自己價值觀，你覺得唔值但人地覺得值就得，其實唔關你事。」

網民：乜都無做過先慘

大量網民力撐樓主朋友追夢十分值得，反問樓主自己能否追夢：

• 「依家可以發夢唔發等幾時？如果份工唔係自己想做咁點解唔趁可以試嘅時間試左先呢？」
• 「有時要好清楚做人係為生活定生存，一個唔好彩瓜咗發現自己乜都無做過先慘。」
• 「只要係自己夢想，就算曇花一現都好。」
• 「值得呀，係有生之年做到自己想做嘅嘢，羨慕。」
• 「佢追到夢，你呢？」
• 「錢賺唔多，但做到想做既夢，佢就已經賺得比你多幾十倍。」
• 「已經上晒岸，萬幾蚊夠洗，搵多幾十萬都無意思，咪去做自己鐘意做既野。」
• 「做夢想的事仲有錢收，何樂而不為？」
• 「個like係俾佢個朋友，根本唔係賺幾多嘅問題，明嘅明。」
• 「創業仲有錢賺又可以達成夢想，應該同佢一齊開心啦⋯剩係諗錢。」
• 「試問有幾多人可以做到自己鐘意既工？何況係追逐自己夢想？唔好講賺唔賺到錢⋯淨係敢行出追夢呢一步已經嬴左。」
• 「你有能力資格做到先講，佢搵到先草到錢同有條件先敢去追夢。」

網民：搵開5萬唔怕出去闖

亦有不少網民指樓主朋友第一次創業不用蝕錢已經好叻，而且原本有月薪5萬的能力根本不怕出去闖：

• 「如果係創業初期扣除成本有錢賺，都好唔容易。」
• 「第一次開舖已經有錢賺，已經好叻 仲可以賺埋經驗。」
• 「有萬幾已經好勁！」
• 「如果佢搵開5萬唔怕出去闖，失敗咗隨時可以返轉頭再搵工。」
• 「佢有搵5萬一個月既能力佢驚乜。」

延伸閱讀：30歲港女呻「月入6萬」男友已絕種 網民一句秒殺：你擔心時間值損耗先啦

延伸閱讀：美股反彈只屬曇花一現？大空頭發佈悲觀預測：熊市喺2023年繼續玩！